عوام میں اس قدر غصہ ہے کہ وزیر گھر سے نکلتے ہی نہیں: تیجسوی یادو

پٹنہ: بہار اسمبلی میں اپوزیشن لیڈر تیجسوی پرساد یادو نے وزیراعلیٰ نتیش کمار کے آبائی ضلع نالندہ میں کھاد کی قلت سے پریشان کسانوں کے پولیس پر حملے کے واقعے پر حکومت پر طنز کستے ہوئے کہا کہ عوام میں اتنا اشتعال ہے کہ وزیر گھر سے نکلتے ہی نہیں ہیں۔

تیجسوی یادو نے بدھ کو سوشل نیٹ ورکنگ سائٹ ٹوئٹر پر نالندہ میں کھاد کی قلت سے پریشان کسانوں کے پولیس پر حملے کے واقعے کا ویڈیو ٹیگ کرتے ہوئے ایک ٹوئٹ کیا ہے جس میں لکھا ہے ’’بہار میں کھاد کی شدید قلت کی وجہ سے کسان مشتعل ہیں۔ ویڈیو ڈبل انجن حکومت کے ٹربل کاری وزیر اعلیٰ کے ہوم ضلع نالندہ کا ہے۔‘‘ انہوں نے مزید کہا کہ بھارتیہ جنتا پارٹی (بی جے پی) اور جنتادل یونائٹیڈ (جے ڈی یو) حکومت سے کسان، نوجوان، تاجر، ملازم، بے روزگا ر، طلباء اور غریب سب پریشان ہیں۔ عوام میں اتنا اشتعال ہے کہ وزیر گھر سے نکلتے ہی نہیں ہیں۔

غورطلب ہے کہ نالندہ میں کھاد کے لیے پریشان کسان منگل کو مظاہرہ کر رہے تھے۔ دریں اثناء کسانوں کو سمجھانے اور جام ختم کرانے گئے اسلام پور تھانہ کے داروغہ جالندھر منڈل پر لوگوں کا غصہ پھوٹ پڑا۔ بھیڑ میں شامل کچھ لوگوں نے ان پر لاٹھی سے حملہ کر دیا، جس میں وہ زخمی ہوگئے۔ پولیس ویڈیو فوٹیج کی بنیاد پر حملہ کرنے والوں کی شناخت کر رہی ہے۔