مرکزی کابینہ نے 24634 کروڑ روپے پر مشتمل 4 ریل منصوبوں کو دی منظوری، ریل نیٹورک 894 کلومیٹر بڑھانے کی تیاری
منظور شدہ ملٹی ٹریکنگ پروجیکٹ سے تقریباً 3633 گاؤں، جن کی آبادی تقریباً 85.84 لاکھ ہے، اور 2 اضلاع ودیشا و راج نندگاؤں تک رابطہ بڑھے گا۔ بڑھی ہوئی لائن سے تیز رفتاری میں قابل ذکر اضافہ ہوگا۔
مرکزی کابینہ نے آج 24634 کروڑ روپے کے 4 اہم ریل منصوبوں کو منظوری دے دی۔ یہ منظوری وزیر اعظم نریندر مودی کی قیادت میں کابینہ کی ہوئی میٹنگ کے دوران ملی۔ منظور شدہ ریل منصوبوں میں وسط ہندوستان میں صلاحیت اور رابطہ بڑھانے کے لیے اہم راستوں پر تیسری اور چوتھی لائنوں کی تعمیر شامل ہے۔
موصولہ اطلاع کے مطابق جن ریل منصوبوں کو منظوری ملی ہے، ان میں مہاراشٹر میں 314 کلومیٹر طویل وردھا-بھوساوَل ڈویژن، مہاراشٹر و چھتیس گڑھ میں پھیلا 84 کلومیٹر طویل گوندیا-ڈونگر گڑھ ڈویژن، گجرات و مدھیہ پردیش کو احاطہ کرنے والا 259 کلومیٹر طویل وڈودرا-رتلام کوریڈور اور مدھیہ پردیش میں 237 کلومیٹر طویل اٹارسی-بھوپال-بینا ڈویژن شامل ہیں۔ مہاراشٹر، مدھیہ پردیش، گجرات اور چھتیس گڑھ ریاستوں کے 18 ضلعوں کو احاطہ کرنے والے 4 منصوبوں سے انڈین ریل کے موجودہ نیٹورک میں تقریباً 894 کلومیٹر کا اضافہ ہوگا۔
قابل ذکر ہے کہ منظور شدہ ملٹی ٹریکنگ پروجیکٹ سے تقریباً 3633 گاؤں، جن کی آبادی تقریباً 85.84 لاکھ ہے، اور 2 اضلاع ودیشا و راج نندگاؤں تک رابطہ بڑھے گا۔ بڑھی ہوئی لائنوں کی صلاحیت سے تیز رفتاری میں خاطر خواہ اضافہ ہوگا، جس کے نتیجہ کار انڈین ریل کی آپریشنل صلاحیت اور خدمات میں بہتری دیکھنے کو ملے گی۔ یہ ملٹی ٹریکنگ تجویز بہتر انتظامات کرنے اور بھیڑ بھاڑ کو کم کرنے کے لیے تیار کی گئی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔