بھاگوت کے بیان کے پیچھے بگڑتی شبیہ یا ارشد مدنی سے ہوئی ملاقات کا اثر؟

آج سے تقریباً دو سال قبل جمعیۃ علمائے ہند کے صدر مولانا سید ارشد مدنی نے راشٹریہ سوئم سیوک سنگھ (آر ایس ایس) کے سربراہ موہن بھاگوت سے اپنی ملاقات کے دوران ہندو مسلم اتحاد پر زور دیا تھ تھا

موہن بھاگوت، تصویر یو این آئی
موہن بھاگوت، تصویر یو این آئی
user

قومی آوازبیورو

نئی دہلی: مسلم راشٹریہ منچ کے اجلاس سے خطاب کرتے ہوئے آر ایس ایس کےسربراہ موہن بھاگوت نے جس طرح ہندو مسلم اتحاد کی بات کی ہے اس نے سب کو حیران کر دیا ہے۔ بھاگوت کا یہ بیان کہ ’اگر کوئی ہندو یہ کہے کہ ہندوستان میں مسلمان نہیں رہنے چاہئیں تو وہ ہندو ہی نہیں ہے یا موب لنچنگ کرنے والے ہندتوا مخالف ہیں‘، سنگھ کی شبیہ کو پوری دنیا میں بہتر بنانے کی کوشش نظر آتا ہے لیکن حقیقت یہ بھی ہے کہ انہوں نے جو کچھ کہا و جمعیۃ علمائے ہند کے صدر مولانا ارشد مدنی ان سے کہہ چکے ہیں۔

آج سے تقریباً دو سال قبل جمعیۃ علمائے ہند کے صدر مولانا سید ارشد مدنی نے راشٹریہ سوئم سیوک سنگھ (آر ایس ایس) کے سربراہ موہن بھاگوت سے اپنی ملاقات کے دوران ہندو مسلم اتحاد پر زور دیا تھ تھا اور کہا تھا کہ اتحاد اس وقت تک یہ قابل عمل نہیں ہو سکتا جب تک کہ آپ اپنے لوگوں میں یہ بات نہ کہیں۔ مولانا مدنی نے مزید کہا تھا کہ موب لنچنگ سب سے بڑا مسئلہ ہے اور اس سے خوف و ہراس پھیلا ہوا ہے۔ اس وقت تک یہ نہیں رک سکتا جب تک کہ اس کے خلاف قانون نہ بن جائے اور لوگوں کو سزا نہ ملے۔


مولانا مدنی نے یہ بھی کہا تھا کہ ہندو مسلم اتحاد وقت کی اہم ضرورت ہے اور اس کے بغیر ملک ترقی نہیں کر سکتا لیکن ہندو مسلم اتحاد کی بات آپ کو ہندوؤں اور ہندو تنظیموں کے درمیان کہنی ہوگی۔ مولانا مدنی نے واضح طور پر بھاگوت سے کہا تھا کہ ہندو مسلم اتحاد کی اہمیت سے آپ کو اپنے لوگوں کو آگاہ کرنا ہوگا۔ ضرورت اس بات کی ہے کہ ہندو مسلم، اتحاد، یکجہتی کی باتیں ہندو تنظیموں اور ہندوؤں کے درمیان کی جائیں تاکہ اس کے اثرات مرتب ہوں اور ملک میں امن و سکون کی فضا ہموار ہو سکے۔

اگر بھاگوت کے بیان کے پیچھے مولانا ارشد سے ہوئی ان کی بات چیت کو وجہ سمجھا جائے تو یہ ایک مثبت تبدیلی ہے لیکن اس کے امکانات بہت کم ہیں کیونکہ سنگھ جس سیاسی پارٹی کی سرپرستی کرتا ہے وہ بر سر اقتدار ہے۔ کورونا کے دوران ہوئی بد انتظامی اور بڑھتی مہنگائی نے بر سر اقتدار جماعت کی شبیہ بہت خراب کر دی ہے جس کی وجہ سے دنیا بھر میں سنگھ کی شبیہ پر بھی اثر پڑا ہے۔ اس لئے بہت ممکن ہے کہ ان بیانات کے پیچھے ارشد مدنی سے ہوئی ان کی ملاقات وجہ نہ ہو بلکہ اصل وجہ شبیہ ہی ہو!

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔