رام مندر میں ’پران پرتشٹھا‘ پر فوری سماعت سے ایک بار پھر عدالت نے کیا انکار، عرضی ہوئی بے معنی!

الٰہ آباد ہائی کورٹ میں ’پران پرتشٹھا‘ تقریب پر روک لگانے سے متعلق جو عرضی داخل کی گئی تھی، اب وہ بے معنی ہو گئی ہے۔ ایسا اس لیے کیونکہ آج عدالت نے اس عرضی پر فوری سماعت سے انکار کر دیا۔ ظاہر ہے ہفتہ (20 جنوری) اور اتوار (21 جنوری) کے روز عدالت کی چھٹی ہے اور پیر (22 جنوری) کے روز رام مندر میں پران پرتشٹھا ہونی ہے، تو آج عدالت کے ذریعہ سماعت سے انکار کرتے ہی تقریب پر روک لگانے والی عرضی کا کوئی مطلب نہیں رہ گیا۔

آج عرضی دہندہ بھولا داس کے وکیل انل بند نے ایکٹنگ چیف جسٹس منوج کمار گپتا کی عدالت میں معاملے کو آج ہی منشن کر اس پر آج ہی سماعت کرنے کی گزارش کی تھی۔ جب یہ معاملہ پیش کیا گیا تو الٰہ آباد ہائی کورٹ نے فوری سماعت سے واضح لفظوں میں انکار کر دیا۔ ہائی کورٹ نے کہا کہ اس عرضی پر فوری سماعت نہیں ہو سکتی۔

قابل ذکر ہے کہ الٰہ آباد ہائی کورٹ نے اس سے قبل بدھ کے روز بھی اس عرضی کو مینشن کرنے کے لیے منظور نہیں کیا تھا۔ بھولا داس کی اس مفاد عامہ عرضی میں پی ایم مودی کے ہاتھوں رام مندر میں پران پرتشٹھا پر روک لگائے جانے کا مطالبہ کیا گیا تھا۔ اس عرضی میں شنکراچاریوں کے اعتراضات کا حوالہ دیتے ہوئے پران پرتشٹھا تقریب کو سناتن روایت کے خلاف بتایا گیا تھا۔ مفاد عامہ عرضی میں یہ بھی الزام عائد کیا گیا تھا کہ بی جے پی 2024 کے لوک سبھا انتخاب میں فائدہ اٹھانے کے لیے یہ تقریب جلد بازی میں کر رہی ہے۔