راجدھانی میں زہریلی ہوا کے ساتھ سردی کا بھی ستم، دسمبر کی اب تک کی سب سے سرد صبح درج

قومی راجدھانی دہلی میں آلودگی کم ہونے کا نام نہیں لے رہی وہیں سردی نے بھی اپنے تیور دکھانے شروع کردیئے گئے۔ جمعہ کے روز صبح دہلی والوں کی آنکھ گہرے اسموگ کی درمیان کھلی،اس دوران ہوا کے معیار کا اوسط انڈیکس327 تھا جو’انتہائی خراب‘ زمرے میں آتا ہے۔ وہیں شہر میں رواں سال دسمبر کی سب سے سرد صبح رہی جس میں درجہ حرارت 5.6 ڈگری سیلسیس تک گر گیا۔

اطلاعات کے مطابق راجدھانی میں 24 گھنٹے کا اوسط ایئر کوالٹی انڈیکس (اے کیوآئی) 327 درج کیا گیا جبکہ صبح کے وقت یہ 323 تھا۔ مرکزی آلودگی کنٹرول بورڈ (پی سی بی) کے اعداد و شمار کے مطابق بوانا میں 373 کے ساتھ سب سے خراب اے کیو آئی ریکارڈ کیا گیا۔

مرکزی آلودگی کنٹرول بورڈ کے ’سمیر‘ ایپ کے اعداد و شمار کے مطابق شام 6 بجے تک ہوا کے معیار کی نگرانی کرنے والے 39 میں سے 31 اسٹیشن ’انتہائی خراب‘ زمرے میں پہنچ گئے تھے جبکہ آر کے پورم میں اے کیو آئی 370 درج کیا گیا۔ جو دن کی سب سے زیادہ سطحوں میں سے ایک ہے۔

پی سی بی  کے معیارات کے مطابق صفر سے 50 کے درمیان ہوا کے معیار کا انڈیکس ’اچھا‘، 51 سے 100 ’اطمینان بخش‘، 101 سے 200 ’معتدل‘، 201 سے 300 ’خراب‘، 301 سے 400 ’انتہائی خراب‘ اور401 سے 500 کے کے درمیان کا اے کیو آئی ’سنگین‘ زمرے میں درج کیا جاتا ہے۔

دریں اثنا ہندوستان کے محکمہ موسمیات کے مطابق جمعہ کو راجدھانی میں زیادہ سے زیادہ درجہ حرارت 23.5 ڈگری سیلسیس ریکارڈ کیا گیا، جب کہ کم سے کم درجہ حرارت 5.6 ڈگری سیلسیس تھا، جو معمول سے 3.9 ڈگری کم ہے اور اس سیزن میں اب تک کا سب سے کم درجہ حرارت ہے۔ اس سے پہلے دسمبر کی سرد ترین صبح 12 دسمبر 2024 کو 4.5 ڈگری سیلسیس ریکارڈ کی گئی تھی۔

محکمہ موسمیات کی جانب سے ملی اطلاع کے مطابق شام ساڑھے پانچ بجے ہوا میں نمی کی سطح 68 فیصد رہی جبکہ صبح 100 فیصد تک پہنچ گئی۔ ہفتہ کو ہلکے کہرے کی پیش گوئی کے ساتھ درجہ حرارت 8 ڈگری سیلسیس سے 23 ڈگری سیلسیس کے درمیان رہنے کا امکان ظاہر کیا گیا ہے۔