تلنگانہ کے وزیر اعلیٰ ریونت ریڈی نے پیش کی بہترین مثال، سڑک کے لیے اپنے گھر کی چہاردیواری منہدم کر دی

تلنگانہ کے وزیر اعلیٰ ریونت ریڈی نے ایک ایسا قدم اٹھایا ہے، جو موجودہ دور کے سیاست دانوں کے لیے ایک بہترین مثال قرار دیا جا رہا ہے۔ ریونت ریڈی ہمیشہ کہتے رہے ہیں کہ ترقیاتی کاموں میں کسی طرح کی تفریق نہیں ہونی چاہیے، اور انھوں نے اپنے اس قول خود بھی عمل کرنے کی مثال پیش کی ہے۔ دراصل ناگرکورنول ضلع کے وانگور واقع وزیر اعلیٰ کی رہائش کونڈاریڈی پلی میں سڑک کی چوڑائی بڑھانے کا کام ہو رہا ہے۔ اس دوران جب وزیر اعلیٰ کی رہائش کی چہار دیواری درمیان میں آئی، تو انھوں نے بغیر کچھ سوچے اسے فوراً گرانے کا حکم دے دیا۔

سڑک کی چورائی کے دوران کئی لوگوں کے گھر ٹوٹ گئے ہیں۔ جانکاری کے مطابق گاؤں میں مجموعی طور سے 43 گھر اس سڑک تعمیر کو لے کر جزوی طور سے توڑنے پڑے ہیں۔ وزیر اعلیٰ کے ذریعہ اپنے گھر کی چہار دیواری کو تورنے کا حکم دیے جانے پر گاؤں والے ریونت ریڈی کی تعریف کرتے نہیں تھک رہے ہیں۔

قابل ذکر ہے کہ کونڈاریڈی پلی میں سڑک بنانے کے دوران رخنہ انداز بن رہی وزیر اعلیٰ کے گھر کی چہاردیواری کو وزیر اعلیٰ ریونت ریڈی کے حکم پر افسران نے دو دن قبل ہی گرا دیا تھا۔ اس سلسلے میں اپنا رد عمل ظاہر کرتے ہوئے ایڈیشنل کلکٹر دیوسہایم نے بتایا کہ وزیر اعلیٰ نے دو ماہ پہلے سڑک کی چوڑائی کاری کے دوران اپنے گھر سے محروم ہونے والوں کو معاوضہ دینے کا حکم دیا تھا۔ اس کے بعد ہی سڑک تعمیرات میں تیزی لائی گئی ہے۔

بہرحال، سڑک چوڑائی کاری کے لیے وزیر اعلیٰ ریونت ریڈی کے گھر کی چہاری دیواری تو گرا ہی دی گئی تھی، اب اس چہار دیواری کی از سر نو تعمیر کا کام چل رہا ہے۔ اس معاملے میں گاؤں والے وزیر اعلیٰ ریونت ریڈی کے نظریات کی خوب تعریف کر رہے ہیں۔ گاؤں والے کہہ رہے ہیں کہ بھلے ہی وہ ہماری ریاست کے وزیر اعلیٰ ہوں، لیکن انھوں نے بغیر کسی تفریق کے افسران کو ہدایت دی کہ گھر کی دیوار گرا دیں۔ گاؤں والوں کا کہنا ہے کہ وزیر اعلیٰ نے اپنی بھلائی نہیں دیکھی، بلکہ گاؤں کے لوگوں کی بھلائی کے بارے میں سوچا۔ اس طرح کا حکم دینا ایک اچھی مثال پیش کرتا ہے۔