تلنگانہ کے وزیراعلیٰ ریونت ریڈی نے 15 اگست تک کسانوں کے قرض کی معافی کا وعدہ کیا

اسمبلی انتخابات سے قبل دی گئی ضمانتوں پر عمل درآمد سے متعلق اپوزیشن پارٹیوں کے بڑھتے ہوئے اعتراضات کے درمیان تلنگانہ کے وزیراعلیٰ اے ریونت ریڈی نے پیر(15 اپریل) کے روز اعلان کیا کہ 2 لاکھ روپے تک کے کسانوں کے قرض 15 اگست تک معاف کردیئے جائیں گے۔ لوک سبھا انتخابات کے لئے پارٹی کی مہم کے ایک حصے کے طور پر پیر کی شام نارائن پیٹ میں کانگریس کے جلسۂ عام سے خطاب کرتے ہوئے، ریونت ریڈی نے کسانوں کو یقین دلایا کہ ان کے قرض ایک ہی وقت میں معاف کردیئے جائیں گے۔

یہ دعوی کرتے ہوئے کہ کانگریس حکومت کسانوں کے قرضوں کو معاف کرنے کے اپنے وعدے سے پیچھے نہیں ہٹے گی، انہوں نے کہا کہ لوک سبھا انتخابات کے ماڈل ضابطہ اخلاق کی وجہ سے اب تک قرض معاف نہیں ہوئے ہیں۔ ریونت ریڈی نے کسانوں کو یہ بھی یقین دلایا کہ حکومت انہیں اگلے فصل کے سیزن سے دھان کی فی کوئنٹل 500 روپے کا بونس دے گی۔ تلنگانہ کانگریس کے سربراہ نے یہ بھی اعلان کیا کہ لوک سبھا انتخابات کی تکمیل کے دو ماہ کے اندر بلدیاتی انتخابات کرائے جائیں گے۔

اس موقع پر وزیر اعلیٰ نے اعلان کیا کہ سرکاری اسکیموں کو 'اندرامّا' کمیٹیوں کے ذریعے نافذ کیا جائے گا۔ ان کمیٹیوں کو اسکیموں کے لیے استفادہ کنندگان کے انتخاب کا اختیار دیا جائے گا۔ انہوں نے یہ بھی الزام لگایا کہ بھارت راشٹرا سمیتی (بی آر ایس) نے ریاست کی 17 لوک سبھا سیٹوں میں سے پانچ پر بی جے پی کی جیت کو یقینی بنانے کے لیے بھارتیہ جنتا پارٹی (بی جے پی) کے ساتھ ایک خفیہ معاہدہ کیا ہے۔ وزیر اعلیٰ نے یہ بھی الزام لگایا کہ بی آر ایس صدر کے چندر شیکھر راؤ نے اپنی بیٹی (کے کویتا) کے لیے ضمانت حاصل کرنے کے لیے اپنی پارٹی کو وزیر اعظم نریندر مودی کے پاس گروی رکھا ہے، جو اس وقت قومی دارالحکومت میں ایکسائز پالیسی کیس میں جیل میں ہیں۔