تیجسوی نے دلائی لامہ سے آشیر واد لیا اورکہاگیا اور بودھ گیا کو سیاحتی طور پر مزید فروغ دیاجائے گا

بہار کے نائب وزیر اعلی تیجسوی یادو نے عالمی ثقافتی ورثہ مہابودھی مندر میں خصوصی پوجا کی۔ تیجسوی یادو کل بودھ گیا میں تبتی مونیسٹری پہنچے، جہاں انہوں نے مذہبی رہنما دلائی لامہ سے ملاقات کی۔ اس دوران انہوں نے دلائی لامہ سے آشیرواد بھی لیا۔ اس کے بعد تیجسوی یادو مہابودھی مندر پہنچے، جہاں انہوں نے مندر کے احاطے میں خصوصی پوجا کی۔

تیجسوی  نے مندر کے احاطے میں واقع بودھی درخت کا بھی معائنہ کیا۔ اس کے بعد انہوں نے مہابودھی کلچرل سنٹر کے قریب زیر تعمیر فائیو اسٹار ہوٹل کا بھی جائزہ لیا اور کلچرل سنٹر کے آڈیٹوریم میں محکمہ سیاحت سے وابستہ عہدیداروں کے ساتھ میٹنگ بھی کی۔ میٹنگ کے دوران انہوں نے محکمہ سیاحت کی جانب سے ضلع میں جاری اسکیموں کا جائزہ لیا۔

تیجسوی یادو نے کہا کہ مذہبی رہنما دلائی لامہ سے ملاقات کے بعد انہوں نے آشیرواد لیا اور مہابودھی مندر میں پوجا کی اور ریاست کے لوگوں کی خوشی اور خوشحالی کے لیے دعا کی۔ انہوں نے کہا کہ مہابودھی مندر میں آنے والے عقیدت مندوں کی تعداد میں مسلسل اضافہ ہو رہا ہے۔ اس سلسلے میں یہاں مسافروں کی سہولیات کو مزید بہتر کرنے کی ضرورت ہے۔ اس حوالے سے محکمہ سیاحت کے افسران کو ضروری ہدایات دے دی گئی ہیں، آنے والے وقت میں سیاحوں کو اس سے بھی بہتر سہولیات فراہم کی جائیں گی۔بودھ گیا میں آنے والے ملکی اور غیر ملکی عقیدت مندوں کے لیے ایک فائیو سٹار ہوٹل تعمیر کیا جا رہا ہے، گیا اور بودھ گیا کو سیاحت کے میدان میں مزید ترقی دی جائے گی۔

اس موقع پر بہار حکومت کے وزیر زراعت کمار سروجیت، کوآپریٹیو وزیر ڈاکٹر سریندر پرساد یادو، گروا کے ایم ایل اے ونے یادو، آر جے ڈی کے ضلع صدرمحمد مرشد عرف نظام بھائی، ضلع مجسٹریٹ ڈاکٹر تیاگ راجن ایس ایم، مہابودھی مندر مینجمنٹ کمیٹی کی سکریٹری مہاسویتا مہارتھی، مہابودھی مندر کے چیف پجاری بھانتے چلندا، بھانتے دیناناتھ اور کئی دوسرے موجود تھے۔