تمل ناڈو: ’مارننگ واک‘ کے دوران ہو گیا کھیل، سابق وزیر اعلیٰ او پنیرسیلوم نے این ڈی اے سے توڑا ناطہ

تمل ناڈو میں اسمبلی انتخاب 2026 میں ہونے والا ہے، لیکن اس سے پہلے ہی ریاست میں سیاسی اٹھا پٹخ شروع ہو چکی ہے۔ ڈرامائی انداز میں آج صبح ریاست کے سابق وزیر اعلیٰ اور اے آئی اے ڈی ایم کے سے معطل لیڈر او. پنیرسیلوم، جنھیں او پی ایس نام سے بھی جانا جاتا ہے، انھوں نے بی جے پی کی قیادت والے این ڈی اے سے علیحدگی کا اعلان کر دیا ہے۔ این ڈی اے کے ساتھ یہ کھیل ’مارننگ واک‘ یعنی صبح کی سیر کے دوران ہوا۔

دراصل صبح کی سیر کے دوران تمل ناڈو کے وزیر اعلیٰ ایم کے اسٹالن سے پنیرسیلوم کی ملاقات ہوئی تھی۔ سیر کرتے ہوئے دونوں میں کچھ بات چیت ہوئی اور کچھ گھنٹے بعد ہی او پنیرسیلوم نے این ڈی اے سے علیحدگی کا اعلان کر دیا۔ ایسی خبریں عام ہیں کہ او پی ایس بی جے پی سے پہلے ہی ناراض چل رہے تھے۔ اس ناراضگی کی وجہ یہ ہے کہ پی ایم مودی نے جب تمل ناڈو واقع گنگئی کونڈا چولپورم کا دورہ کیا تھا تو او پی ایس سے ملاقات نہیں کی۔ پی ایم مودی سے ملاقات کے لیے او پی ایس نے انھیں ایک خط بھی لکھا تھا جس میں کہا تھا کہ ان سے ملاقات کرنا اُن کے لیے اعزاز کی بات ہوگی۔ او پی ایس نے اس ملاقات کے لیے رسمی طور پر وقت بھی طلب کیا تھا، لیکن او پی ایس کو یہ وقت نہیں دیا گیا۔

تصور کیا جا رہا ہے کہ بی جے پی کے ذریعہ نظر انداز کیے جانے سے او پی ایس خفا ہو گئے۔ اس واقعہ کے بعد ہی انھوں نے ’سرو شکشا ابھیان‘ (ایس ایس اے) کی فنڈ تقسیم میں تاخیر سے متعلق سوشل میڈیا پر مرکزی حکومت کو تنقید کا نشانہ بنایا۔ اب پنیرسیلوم کا بی جے پی سے دوری بنانا ریاست کی سیاست میں اہم موڑ مانا جا رہا ہے۔

او پی ایس کے قریبی ساتھی اور وفادار رہے پنروتی ایس رام چندرن نے این ڈی اے سے علیحدگی کے بارے میں میڈیا کو جانکاری دی۔ انھوں نے کہا کہ او پنیرسیلوم کی قیادت والی ’اے آئی اے ڈی ایم کے کیڈر رائٹس ریٹریول کمیٹی‘ نے رسمی طور سے بی جے پی کی قیادت والے این ڈی اے سے ناطہ توڑ لیا ہے۔ انھوں نے مزید کہا کہ او پی ایس 2026 کے تمل ناڈو اسمبلی انتخاب سے قبل ریاست گیر دورہ شروع کریں گے اور اس کی تیاری شروع ہو چکی ہے۔

رام چندرن نے پنیرسیلوم کے آئندہ منصوبوں سے متعلق پوری وضاحت فی الحال پیش نہیں کی ہے۔ ان کا کہنا ہے کہ ’’فی الحال کسی بھی پارٹی کے ساتھ کوئی اتحاد نہیں ہوگا۔ مستقبل میں ہم اس معاملے پر کوئی فیصلہ لیں گے۔‘‘ انھوں نے اداکار وجئے کی پارٹی ’تملگا ویتری کزگم‘ (ٹی وی کے) کے ساتھ ہاتھ ملانے کے امکان سے بھی انکار نہیں کیا۔ ممکنہ اتحاد کے بارے میں پوچھے جانے پر انھوں نے بس اتنا کہا کہ ’’وقت بتائے گا۔‘‘