کروناندھی کے آخری دیدار میں امنڈا جم غفیر، راہل کا خراج تحسین

کروناندھی کا جسد چنئی کے راجا جی ہال میں رکھا ہوا ہے جہاں آخری دیدار کے لئے لوگوں کا جم غفیر امنڈا ہوا ہے۔ دریں اثنا اہم شخصیات کے بھی پہنچنے کا سلسلہ جاری۔ کانگریس صدر راہل گاندھی نے بھی راجا جی ہال پہنچ کر کروناندھی کو خراج عقیدت پیش کیا۔

راہل گاندھی چنئی کے کاویری اسپتال میں کروناندھی کی عیادت کے لئے بھی پہنچے تھے۔

راجا جی ہال کے باہر کروناندھی کے آخری دیدار کے لئے ہزاروں لوگوں کا ہجوم بے قابو ہو رہا ہے۔ پولس اور لوگوں کے بیچ ہوئی دھکا مکی کے بعد کروناندھی کے بیٹے ایم کے اسٹالن نے پارٹی کے حامیوں اور کروناندھی کے لاکھوں شیدائیوں سے امن برقرار رکھنے کی اپیل کی ہے۔

راجا جی ہال میں ہنگامہ ہونے کے بعد پولس کی طرف سے دروازہ بند کر دئے جانے کے بعد کروناندھی کے حامی دیوار سے چڑھ کر اندر جانے کی کوشش کرنے لگے۔

چنئی کے مرینا ساحل پر اس وقت کروناندھی کی آخری رسومات ادا کرنے کی تیاریاں چل رہی ہیں۔ انہیں جس مقام پر دف کیا جائے گا وہاں کھدائی کا کام زور شور سے جاری ہے۔

چنئی کے راجا جی ہال میں جہاں کروناندھی کے جسد خاکی کو آخری دیدار کے لئے رکھا گیا ہے وہاں بھگدڑ کی خبر ہے۔ میڈیا رپورٹوں کے مطابق 40 افراد زخمی ہو گئے ہیں۔

مدراس ہائی کورٹ کے فیصلہ کے بعد کروناندھی کی مرین بیچ پر تدفین کی اطلاع پاکر ڈی ایم کے کے لاکھوں حامی چنئی کے مرینا ساحل کے انامیموریل کے قریب جمع ہوگئے ہیں۔ ڈی ایم کے کارکنوں نے مدراس ہائی کورٹ کے فیصلہ کااستقبال کیااور اس کو ڈی ایم کے کی جیت قرار دیا۔ لاکھوں افراد کو اپنے محبوب رہنما کی آخری رسومات کیلئے جمع دیکھا گیا۔

ڈی ایم کے کے سربراہ اور تمل ناڈو کے سابق وزیر اعلی ایم كروناندھی کو آج راجیہ سبھا نے خراج عقیدت پیش کی جس کے بعد آنجہانی لیڈر کے اعزاز میں ایوان کی کارروائی دن بھر کے لئے ملتوی کر دی گئی۔ ادھر لوک سبھا کی کارروائی بھی کروناندھی کو خراج تحسین پیش کرنے کے بعد ملتوی کر دی گئی۔

ایوان کی کارروائی شروع ہوتے ہی چیئرمین ایم ونکیا نائیڈو نے اراکین کو ڈی ایم کےرہنما کے انتقال کی اطلاع دی۔ انہوں نے کہا کہ جون 1924 میں تمل ناڈو کے ناگاپٹنم ضلع میں پیدا ہوئے كروناندھی مختلف صلاحیتوں کے انسان تھے۔

نائیڈو نے کہا کہ کروناندھی کے انتقال سے ملک نے ایک قابل ایڈمنسٹریٹر اور سماجی کارکن کھو دیا۔ اس کے بعد ارکان نے خاموش رہ کر آنجہانی لیڈر کو خراج عقیدت پیش کیا۔

چنئی: تمل ناڈو کے سابق وزیراعلی اور ڈی ایم کے صدر ایم کروناندھی کا جسدخاکی بدھ کی صبح راجاجی ہال میں رکھا گیا ہے جہاں ان کے آخری دیدار کے لئے لوگوں کی زبردست بھیڑ جمع ہے۔

انتقال کے بعد کروناندھی کا جسد خاکی پہلے گوپال پورم میں واقع ان کی رہائش گاہ لایا گیا تھا جہاں سے ان کی بیٹی اور راجیہ سبھا کی ممبر پارلیمنٹ کنی موجھی کے گھر لے جایا گیا لیکن لوگوں کے ہجوم کے پیش نظر ان کا جسد خاکی ترنگے میں لپیٹ کر راجاجی ہال میں رکھا گیا ہے جہاں لوگ ان کا آخری یدار کررہے ہیں۔

ریاست کے گورنر بنواری لال پروہت نے راجاجی ہال جاکر آنجہانی لیڈر کو گلہائے عقیدت پیش کئے۔ انہوں نے ڈی ایم کے ایگزیکٹو چیئرمین ایم کے اسٹالن سے بھی کچھ دیر گفتگو کی۔

واضح رہے کہ گزشتہ 11 دنوں سے اسپتال میں داخل کروناندھی کا کل شام چھ بجکر 10 منٹ پر انتقال ہوگیا ہے۔ مرکزی حکومت نے ان کے تئیں تعزیت کا اظہار کرتے ہوئے ایک دن کے قومی سوگ جبکہ ریاست نے ایک ہفتے کے سوگ کا اعلان کیا ہے نیز قومی پرچم آدھا جھکا رہے گا۔ اس دوران سبھی سرکاری تقریبات ملتوی کردی گئی ہیں۔

(یو این آئی)

دریں اثنا وزیر اعظم نریندر مودی نے چنئی کے راجا جی ہال پہنچ کر کروناندھی کو خراج عقیدت پیش کیا۔ خراج تحسین پیش کرنے کے بعد وزیر اعظم نے کنی موجھی اور ایم کے اسٹالن سے بات کی۔

کروناندھی کو خراج تحسین پیش کرنے کے لئے وزیر اعظم نریندر مودی چنئی پہنچ گئے ہیں۔ کچھ ہی دیر میں وہ راجا جی ہال پہنچیں گے جہاں کروناندھی کے جسد خاکی کو آخری دیدار کے لئے رکھا گیا ہے۔

دریں اثنا راجا جی ہال میں کرورناندھی کے آخری دیدار کے لئے لوگوں کا جم غفیر امنڈ رہا ہے۔ راجا جی ہال پہنچ کر ساؤتھ کے سپر اسٹار کمل ہاسن نے بھی انہیں خراج تحسین پیش کیا۔

چنئی کے مرینا ساحل پر کروناندھی کی سمادھی بنانے کی مانگ کو لے کر مدراس ہائی کورٹ میں سماعت کے بیچ انا میموریل کے باہر حفاظت سخت کر دی گئی ہے۔ یہاں بڑی تعداد میں حفاظتی عملہ کی تعیناتی کی گئی ہے۔

کروناندھی کا جسد خاکی آخری رسومات کے لئے چنئی کے راجا جی حال میں رکھا گیا ہے، جہاں ان کے آخری دیدار کے لئے بڑی تعداد میں لوگ پہنچ رہے ہیں۔ کئی بڑی شخصیات بھی کروناندھی کے آخری دیدار کے لئے پہنچی ہیں۔ قبل ازیں چنئی کی سی آئی ای کالونی میں رات بھر کروناندھی کے جسد خاکی کو آخری دیدار کے لئے رکھا گیا تھا۔

چنئی: تمل ناڈو سیاست کے قدآور سیاستداں، دراوڈ منیترا کزگم (ڈی ایم کے) کے سربراہ اور ریاست کے سابق وزیر اعلی متویل کروناندھی کا منگل کو کاویری اسپتال میں انتقال ہو گیا۔ وہ 94 برس کے تھے۔ انہوں نے شام 6 بج کر 10 منٹ پر آخری سانس لی۔ کروناندھی کی جسد خاکی کو راجاجي ہال میں آخری دیدار کے لئے رکھ دیا گیا ہے۔

ملک بھر میں غم کی لہر

کروناندھی بلڈ پریشر کی کمی کے بعد 28 جولائی سے کاویری اسپتال میں داخل تھے۔ ان کی حالت گزشتہ رات شدید نازک ہونے کے بعد سے ہی بڑی تعداد میں لوگ اسپتال کے باہر جمع ہونا شروع ہو گئے تھے اور گذشتہ شام وہاں زبردست ہجوم تھا۔ ان کے انتقال کی خبر پھیلتے ہی تمل ناڈو سمیت پورے ملک میں غم کی لہر دوڑ گئی اور ڈی ایم کے حامی سڑکوں پر نکل آئے۔

تمل ناڈو میں ہائی الرٹ

ڈی ایم کے ایگزیکیٹو چیئرمین ایم کے اسٹالن نے پارٹی کارکنوں سے کسی بھی طرح کے تشدد کا مظاہرہ کرنے سے دور رہنے کی اپیل کی ہے۔ انہوں نے کہا کہ امن و سکون برقرار رکھیں، کیونکہ یہی اپنے ہردل عزیز رہنما کے لئے احترام کا اظہار کرنے کا مناسب طریقہ ہے۔ چنئی اور دیگر شہروں میں ڈی ایم کے حامیوں کی بڑی تعداد کو دیکھتے ہوئے ریاست کی پولس کو بھی ہائی الرٹ کردیا گیا ہے۔

مرینا ساحل پر آخری رسومات پر پس و پیش

کروناندھی کے بیٹے اسٹالن نے تمل ناڈو کے وزیر اعلی کو خط لکھ کر ان کی آخری رسومات کے لئے مرینا ساحل پر زمین دینے کا مطالبہ کیا ہے۔ ذرائع کے مطابق ڈی ایم کے ممبران پارلیمنٹ نے کروناندھی کی آخری رسومات کے واسطے مرینا بیچ پر زمین دینے کے لئے مرکزی حکومت سے مداخلت کی اپیل کی ہے۔

تمل ناڈو کے چیف سکریٹری نے کہا کہ ریاستی حکومت کروناندھی کے لئے گاندھی منڈپم پر دو ایکڑ زمین دینے کو تیار ہے، لیکن مرینا بیچ پر نہیں، کیونکہ وہاں پر قانونی دشواریاں درپیش ہیں۔

کروناندھی کے انتقال پر تمل ناڈو حکومت نے بدھ کو چھٹیوں اور ریاست میں سات روزہ سوگ کا اعلان کیا ہے۔ ان کے انتقال کے بعد تمل ناڈو میں سنیما گھروں کو بند کر دیا گیا ہے۔ تھیئٹر آنر ایسوسی ایشن کے ابیرامی رامناتھن اور پننيرسیلوم نے اس کی تصدیق کی۔

رہنماؤں اور ممتاز شخصیات کا رنج و غم کا اظہار

دریں اثناء، صدر جمہوریہ رام ناتھ كووند، نائب صدر وینکیا نائیڈو، وزیر اعظم نریندر مودی، کانگریس صدر راہل گاندھی، لوک سبھا اسپیکر سمترا مہاجن نیز دہلی کے وزیر اعلی اروند کیجریوال سمیت ریاستوں کے وزراء اعلیٰ اور فلمی اداکاروں اور ملک و بیرون ملک سے دوسرے رہنماؤں اور ممتاز شخصیات نے کروناندھی کے انتقال پر رنج و غم کا اظہار کیا ہے۔