دہلی اسمبلی انتخابات: پیرول پر رہا طاہر حسین کی انتخابی تشہیر میں شرکت، ’مصطفی آباد کے عوام پر جیت کا بھروسہ‘

نئی دہلی: دہلی فسادات کے ملزم اور مصطفی آباد اسمبلی حلقہ سے اے آئی ایم آئی ایم کے امیدوار طاہر حسین حراستی پیرول پر جیل سے باہر آ گئے ہیں اور انتخابی تشہیر میں حصہ بھی لے رہے ہیں۔ نیوز ایجنسی آئی اے این ایس سے بات کرتے ہوئے انہوں نے اعتماد ظاہر کیا کہ مصطفی آباد کے عوام انہیں جتوانے کا کام کریں گے۔

طاہر حسین نے کہا، ’’پانچ سال بعد جیل سے باہر آنے کا موقع ملا ہے، جس پر میں بہت خوش ہوں۔ جیل سے نکلتے وقت گھبراہٹ اور پریشانی محسوس ہوئی لیکن عوام کا جوش دیکھ کر خوشی ہو رہی ہے۔ یہ ثابت ہوتا ہے کہ مصطفی آباد کے عوام نے اپنا فیصلہ کر لیا ہے اور وہ پہلی بار اپنے علاقے کے ایک عام شخص کو ایم ایل اے بنانے جا رہے ہیں۔ مجھے یقین ہے کہ عوام میری مشکلات اور آنسوؤں کو دیکھ رہے ہیں۔‘‘

قابل ذکر ہے کہ طاہر حسین کو دہلی اسمبلی انتخابات کے دوران انتخابی مہم کے لیے حراستی پیرول کی اجازت دی گئی ہے۔ سپریم کورٹ نے پیرول دیتے ہوئے شرط رکھی کہ تمام اخراجات انہیں خود برداشت کرنے ہوں گے۔ دہلی پولیس کے اہلکار ان کے ساتھ تعینات ہوں گے اور ان کے اخراجات بھی انہی کو اٹھانے ہوں گے۔

عدالتی احکامات کے مطابق، طاہر حسین کو ہر روز 12 گھنٹے انتخابی مہم چلانے کی اجازت دی گئی ہے، تاہم انہیں اپنے انتخابی دفتر کے علاوہ کسی اور جگہ جانے کی اجازت نہیں۔ خاص طور پر، وہ اپنے علاقے کراول نگر نہیں جا سکتے اور اپنے خلاف چل رہے مقدمات پر عوام یا میڈیا سے کوئی بات نہیں کر سکتے۔

دہلی اسمبلی کے تمام 70 حلقوں میں 5 فروری کو ایک ہی مرحلے میں ووٹنگ ہوگی اور نتائج 8 فروری کو جاری کیے جائیں گے۔