رائے بریلی میں سوامی پرساد موریہ پر حملہ، نوجوان نے مالا پہنا کر پیچھے سے مارا طمانچہ

آر ایس ایس پی کے قومی صدر سوامی پرساد موریہ پر حملہ ہوا ہے۔ رائے بریلی میں کارکنوں کے ذریعہ ان کا استقبال کیا جا رہا تھا تبھی دو نوجوانوں نے مالا پہناتے ہوئے پیچھے سے ان پر طمانچہ جڑ دیا۔ طمانچہ موریہ کو لگتے ہوئے پارٹی کارکن کو لگا۔ ناراض کارکنوں نے دونوں نوجوانوں کو پکڑا اور ان کی پٹائی شروع کر دی۔ بتایا جاتا ہے کہ مارپیٹ میں انسپکٹر اجے رائے کو بھی چوٹیں آئی ہیں۔

دراصل فتح پور جاتے وقت رائے بریلی میں سوامی پرساد موریہ رکے تھے۔ تبھی میلیریا تھانہ علاقے کے سارس چوراہے میں یہ واقعہ پیش آیا۔ وائرل ویڈیو میں صاف دیکھا جا سکتا ہے کہ نوجوان بھیڑ کے درمیان گھس کر موریہ پر حملہ کا موقع تلاش کرتا ہے۔ باڈی گارڈ کی نظر سے بچ کر موقع مل جانے پر ان کے سر پر طمانچہ مارتا ہے۔ حملہ کرنے کے فوراً بعد نوجوان موقع سے فرار ہونے کی کوشش کرتا ہے لیکن کارکن اسے پکڑ لیتے ہیں اور سبق سکھاتے ہیں۔

سوامی پرساد موریہ کو حملے میں کوئی شدید چوٹ نہیں آئی ہے، وہ پوری طرح سے محفوظ ہیں۔ نوجوان نے انہیں پیچھے سے مارا تھا جو انہیں ہلکا سا لگا اور دوسرے کارکن کو لگ گیا۔ باڈی گارڈ اور کارکنان حملہ ہونے کے بعد نوجوان کی طرف تیزی سے بڑھے اور اسے پکڑ لیا۔

واقعہ کے بعد سوامی پرساد موریہ نے ریاستی حکومت پر حملہ بولا ہے۔ انہوں نے کہا کہ یوگی حکومت کے غنڈے ہیں کرنی سینا کے لوگ۔ انہوں نے یوگی حکومت میں غنڈہ راج اور ٹھاکروں کو چھوٹ دینے کا الزام لگایا ساتھ ہی پولیس کی موجودگی میں حملہ ہونے پر قانونی نظام کو تباہ قرار دیا۔ موریہ نے اپنے کارکنان سے امن بنائے رکھنے کی اپیل کی اور انتظامیہ سے حملہ آوروں کے خلاف سخت کارروائی کا مطالبہ کیا۔

اس پورے ہنگامے کے درمیان موقع پر موجود پولیس نے بیچ بچاؤ کیا اور حملہ آور کو اپنی حراست میں لے لیا۔ ابھی تک حملہ کرنے والوں کی تصدیق نہیں ہو سکی ہے۔ پوچھ تاھ جاری ہے۔ پولیس کا کہنا ہے کہ وہ پورے معاملے کی جانچ کر رہے ہیں اور جلد ہی باقی ملزمین کو بھی گرفتار کر لیا جائے گا۔ پروگرام کے مقام پر کثیر تعداد میں پولیس دستہ تعینات کر دیا گیا ہے تاکہ اس طرح کا واقعہ دوبارہ پیش نہ آئے۔ حالانکہ سوامی پرساد موریہ پر ہوئے حملے کی یہ کوشش موضوع بحث بن چکی ہے۔