اتر پردیش: پھر ایک صحافی کی مشتبہ حالت میں موت،خاتون داروغہ و سپاہی پر کیس درج!

اتر پردیش پولس ایک بار پھر سنگین الزامات کے دائرے میں پھنس گئی ہے۔ اس بار خاکی پر داغ اناؤ ضلع میں لگا ہے۔ دراصل ضلع کے صدر کوتوالی علاقہ میں ریلوے کراسنگ کے پاس جمعرات کی شام ایک صحافی سورج پانڈے کی لاش برآمد ہوئی، جس سے علاقے میں ایک ہنگامہ برپا ہو گیا۔ معاملے میں مہلوک کے اہل خانہ نے ایک خاتون داروغہ اور سپاہی پر دھمکانے کے ساتھ ساتھ قتل کا الزام بھی عائد کیا ہے۔

اس قتل معاملہ میں صحافی سورج پانڈے کی ماں لکشمی دیوی نے خاتون داروغہ سنیتا چورسیا، سپاہی امر سنگھ سمیت کچھ دیگر لوگوں پر سورج کو دھمکانے، قتل کی سازش تیار کرنے اور خودکشی کے لیے اکسانے کا الزام عائد کیا ہے۔ اس الزام کے بعد صدر کوتوالی میں ان کی تحریر پر پولس نے خاتون داروغہ اور سپاہی سمیت نامعلوم افراد کے خلاف ایف آئی آر درج کر لی ہے۔

اناؤ سی او سٹی گورو ترپاٹھی نے اس تعلق سے بتایا کہ صحافی کی لاش جمعرات شام پراسرار حالت میں صدر کوتوالی کے پاس ریل کی پٹریوں پر ملی تھی۔ بعد میں دیر رات لاش کا پوسٹ مارٹم کیا گیا۔ انھوں نے کہا کہ خاتون سب انسپکٹر اورکانسٹیبل کے خلاف کیس درج کیا گیا ہے اور معاملے میں جانچ کے بعد آگے کی کارروائی کی جائے گی۔

ایسا اندیشہ ظاہر کیا جا رہا ہے کہ صحافی سورج پانڈے نے خودکشی کی ہے۔ سورج پانڈے کی لاش صدر کوتوالی علاقہ میں شراب مل کے پیچھے ریلوے ٹریک پر بری حالت میں ملی تھی۔ مہلوک کے والد کے مطابق خاتون داروغہ کی سورج سے دوستی تھی۔ انھوں نے سپاہی کی مدد سے سورج کا قتل کرانے کا الزام خاتون داروغہ پر لگایا ہے۔ پولس نے سورج کے موبائل کی کال ڈیٹیل حاصل کر اس کی بنیاد پر جانچ شروع کر دی ہے۔