راجیو سے پوچھ تاچھ کے لئے پختہ ثبوت پیش کرے سی بی آئی: سُپریم کورٹ

نئی دہلی: سپریم کورٹ نے منگل کو مرکزی تفتیشی بیورو (سی بی آئی) سے کہا کہ اگر اسے پوچھ تاچھ کے لئے کولکاتا کے سابق پولس کمشنر راجیو کمار کو حراست میں لینا ہے تو ان کے خلاف انہیں ثبوت پیش کرنے ہوں گے۔

چیف جسٹس رنجن گوگوئی کی صدارت والی بنچ نے سی بی آئی کی جانب سے پیش سالیسیٹر جنرل تشار مہتا سے کہا کہ اگر پوچھ تاچھ کرنےکے لئے راجیو کمار کو حراست میں لینا ہے تو اسے شاردا چٹ فنڈ گھپلے کے ثبوت ختم کرنے میں سابق پولس کمشنر کے شامل ہونے کے ثبوت دینے ہوں گے۔ عدالت نے اس معاملے کی اگلی سماعت یکم مئی مقرر کی ہے۔

جسٹس گوگوئی نے کہا کہ ’’سی بی آئی ثبوت دے کہ راجیو کمار شاردا چٹ فنڈ گھپلےکے ثبوت ختم کرنے میں شامل رہے ہیں۔‘‘ سی بی آئی نے کمار پر ثبوت مٹانے اور جانچ میں تعاون نہ کرنے کا الزام لگاتے ہوئے گرفتاری کا مطالبہ کیا ہے۔ مہتا نے بنچ سے کہا کہ راجیو کمار کے خلاف جو ثبوت موجود ہیں وہ کل اسے پیش کر دیں گے۔ اس کے بعد جانچ ایجنسی کی عرضی بدھ کو سماعت کے لئے درج کر لی گئی۔

واضح رہے کہ سی بی آئی عدالتی حکم پر شاردا چٹ فنڈ گھوٹالہ کی جانچ کر رہی ہے اور اب وہ کولکاتا کے سابق پولس کمشنر راجیو کمار کو حراست میں لے کر پوچھ گچھ کرنا چاہتی ہے۔ سی بی آئی کا دعوی ہے کہ راجیو کمار نے سابقہ پوچھ گچھ کے دوران گول مول جواب دیئے ہیں۔

(یو این آئی ان پٹ کے ساتھ)