دہلی میں 15 ماہ تک شکر فری! ریکھا حکومت کا نئے سال پر غریبوں کو بڑا تحفہ

قومی راجدھانی میں کئی ماہ سے آلودگی اور نظم ونسق پر اُٹھ رہے سوالوں اورمہنگائی سے عوامی ناراضگی کے درمیان دہلی حکومت نے نئے سال کے آغاز پرغریب اور ضرورت مند خاندانوں کو خوش کرنے کا فیصلہ کیا ہے۔ سنیچر کے روز وزیر اعلیٰ ریکھا گپتا کی زیر صدارت منعقد دہلی کابینہ کی میٹنگ نے ’انتودیا ان یوجنا‘ کے تحت مفت شکر (چینی) کی تقسیم کو منظوری دی ہے۔

یہ فیصلہ دہلی میں جنوری 2026 سے مارچ 2027 تک نافذ رہے گا اوراس سے تمام اے اے وائی کارڈ ہولڈرز کو فائدہ پہنچے گا۔ حکومت کے اس فیصلے کو دہلی والوں، خاص طور پر معاشی طور پر کمزور طبقات کے لیے نئے سال کا بڑا تحفہ مانا جا رہا ہے، جس سے لاکھوں خاندانوں کو براہ راست راحت ملے گی۔

کابینہ میٹنگ میں فیصلہ کیا گیا کہ ’انتیودیا ان یوجنا‘ کے تحت تمام اہل خاندانوں کو 15 ماہ تک مفت شکر فراہم کی جائے گی۔ یہ مدت جنوری 2026 سے مارچ 2027 تک مقرر کی گئی ہے۔ حکومت کا خیال ہے کہ مہنگائی کے دور میں خوراک کی بڑھتی ہوئی قیمتوں کا براہ راست اثرغریب خاندانوں کے کچن پر پڑتا ہے۔ ایسے میں مفت شکر کی تقسیم کا یہ فیصلہ روزمرہ کی ضروریات پوری کرنے میں مددگار ثابت ہوگا۔

کابینہ میٹنگ کے بعد وزیر اعلیٰ ریکھا گپتا نے کہا کہ غریبوں اور ضرورت مندوں کی فلاح و بہبود دہلی حکومت کی اولین ترجیح ہے۔ انہوں نے واضح کیا کہ حکومت کا مقصد اس بات کو یقینی بنانا ہے کہ کوئی بھی غریب خاندان بنیادی ضروریات سے محروم نہ رہے۔ خوراک کی حفاظت، سماجی انصاف اور مساوی مواقع حکومت کی پالیسیوں کے لیے لازم و ملزوم ہیں۔ وزیر اعلیٰ کے مطابق ایسے فیصلے معاشرے کے کمزور طبقات کو باوقار زندگی فراہم کرنے کی جانب ٹھوس اقدامات ہیں۔

’انتودیا ان یوجنا‘ حکومت ہند کی کلیدی اسکیم ہے، جس کا مقصد غریبوں میں سب سے غریب خاندانوں کو سستی شرحوں پر خوراک دستیاب کرانا ہے۔ یہ اسکیم بے سہارا، بوڑھے، معذور، بے زمین مزدور اور انتہائی کمزور خاندانوں کا احاطہ کرتی ہے۔ ہراے اے وائی خاندان کو فی ماہ 35 کلو گرام غذائی اجناس جس میں گندم اور چاول شامل ہوتے ہیں، فراہم کیاجاتا ہے۔  یہ اسکیم نیشنل فوڈ سیکیورٹی ایکٹ کے تحت آتی ہے اور ملک میں غذائی تحفظ کو یقینی بنانے کا ایک اہم ذریعہ ہے۔ مفت شکر تقسیم کرنے کے دہلی حکومت کے فیصلے سے اس اسکیم کے فوائد میں مزید اضافہ ہوگا، جس سے لاکھوں غریب خاندانوں کو طویل مدتی راحت ملے گی۔