اسٹار لنک کو ہندوستان میں سیٹلائٹ انٹرنیٹ کا لائسنس ملا، اب آسمان سے ملک کے کونے کونے میں پہنچے گا انٹرنیٹ

دنیا کے امیر ترین کاروباری ایلون مسک کی کمپنی اسٹار لنک کو ہندوستان میں سیٹلائٹ بیسڈ انٹرنیٹ سروس شروع کرنے کے لیے یونیفائڈ لائسنس مل گیا ہے اور ساتھ ہی اسپکٹرم الاٹمنٹ کے لیے پالیسی فریم ورک کو بھی حتمی شکل دے دی گئی ہے۔ مرکزی وزیر ٹیلی مواصلات جیوترادتیہ سندھیا نے یہ اطلاع دی۔

ملک میں پہلے موبائل کال کے 30 سال مکمل ہونے پر یہ اعلان کیا گیا۔ سندھیا نے کہا- ’’اسٹار لنک کو ہندوستان میں سیٹلائٹ انٹرنیٹ خدمات شروع کرنے کے لے یونیفائڈ لائسنس دیا گیا ہے۔ اسپکٹرم الاٹمنٹ اور گیٹ وے تعمیر کے لیے پالسی فریم ورک تیار کر لیا گیا ہے تاکہ خدمات شروع کرنے میں کوئی رکاوٹ پیدا نہ ہو۔‘‘

گیٹ وے اسٹرکچر سیٹلائٹ سے ڈاٹا کو ہندوستان میں لانے اور ہندوستان کے انٹرنیٹ دھانچے سے جوڑنے کے لیے ضروری ہوگی۔ بھارتی گروپ حمایت یافتہ یوٹیل سیٹ ون ویب اور جیو ایس ای ایس کو بھی سیٹلائٹ پر مبنی مواصلات خدمات شروع کرنے کے لیے اسپکٹرم الاٹمنٹ کا انتظار ہے۔ سندھیا نے کہا کہ گزشتہ 11 برسوں میں وزیر اعظم نریندر مودی کی قیادت میں ڈیجیٹل سفر بہترین رہا ہے۔

سندھیا نے کہا کہ دور دراز کے گاؤں سے لے کر میٹرو شہروں تک ڈیجیٹل پہنچ نے شہریوں کو بااختیار بنایا ہے اور ہندوستان کو سستی اور جامع ٹکنالوجی کا عالمی قائد بنا دیا ہے۔ انہوں نے بتایا کہ ملک میں اب 1.2 لاکھ ٹیلی فون کنکشن ہیں اور انٹرنیٹ صارفین 286 فیصد بڑھ کر 97 کروڑ تک پہنچ چکے ہیں۔ براڈ بینڈ استعمال بھی 2014 کے مقابلے میں 1450 فیصد بڑ کر اب 94.4 کروڑ ہو گیا ہے۔

وزیر ٹیلی مواصلات نے آگے کہا کہ موبائل ڈاٹا کی شرح میں 96.6 فیصد کی گراوٹ کے ساتھ ہندوستان عالمی سطح پر سب سے سستا ڈاٹا فراہم کرنے والا ملک بن گیا ہے۔۔ انہوں نے کہا کہ سرکاری ٹیلی مواصلات کمپنی بی ایس این ایل کا دوبارہ قدم جمانا بڑی کامیابی ہے۔ سندھیا نے کہا، ’’18 برسوں میں پہلی بار بی ایس این ایل نے مسلسل دو برسوں تک خالص منافع درج کیا ہے۔ اس نے 83000 سے زیادہ 4جی نیٹ ورک سائٹ قائم کیے ہیں، جن میں سے 74000 پہلے ہی چالو ہو چکے ہیں۔‘‘

سندھیا نے کہا کہ ملک کے 99.6 فیصد ضلعوں تک 5 جی نیٹ ورک کوریج ہو چکا ہے اور 4.74 لاکھ 5 جی ٹاوروں کے توسط سے 30 کروڑ صارفین اس کا فائدہ اٹھا رہے ہیں۔ فی شخص ماہانہ 5 جی ڈاٹا کھپت 32 جی بی ہے جو دنیا میں سب سے زیادہ ہے۔ ٹیلی کام انڈسٹری آرگنائزیشن سیلیولر آپریٹرس ایسو سی ایشن آف انڈیا (سی او اے آئی) کے ڈائرکٹر جنرل ایس پی کوچر نے تقریب کے دوران کہا، ’’ہندوستان دنیا کا دوسرا سب سے بڑا ٹیلی کمیونکیشنز کا بازار ہے۔ آج ایک اوسط ہندوستانی صارفین فی مہینہ 21 جی بی سے زیادہ ڈاٹا کا استعمال کرتا ہے۔