سری نگر: سیکورٹی فورسز پر گرینیڈ حملہ، ایک معمر شہری ہلاک، 24 دیگر زخمی

زخمیوں کو علاج و معالجے کے لئے شری مہاراجہ ہری سنگھ اسپتال منتقل کیا گیا، تاہم 65 سالہ معمر شہری جس کی شناخت محمد اسلم ساکن مخدوم صاحب سری نگر کے بطور ہوئی ہے جانبر نہ ہو سکا۔

سیکورٹی فورسزِ تصویر آئی اے این اس
سیکورٹی فورسزِ تصویر آئی اے این اس
user

یو این آئی

سری نگر: گرمائی دارلحکومت سری نگر کے امیرا کدل علاقے میں اتوار کے روز مشتبہ ملی ٹنٹوں نے سیکورٹی فورسز پر گرینیڈ حملہ کر دیا جس کے نتیجے میں ایک پولیس اہلکار سمیت 23 عام شہری زخمی ہوگئے، جن میں سے بعد میں 65 سالہ معمر شہری زخموں کی تاب نہ لا کر چل بسا۔ یو این آئی اردو کے نامہ نگار نے بتایا کہ سری نگر کے امیرا کدل علاقے میں اتوار کے روز مشتبہ ملی ٹنٹوں نے سیکورٹی فورسز پر ایک گرنیڈ داغا۔

انہوں نے بتایا کہ اس گرینیڈ حملے میں ایک پولیس اہلکار اور 23 عام شہری زخمی ہوگئے جبکہ کئی گاڑیوں کے شیشے بھی ٹوٹ گئے۔ زخمیوں کو علاج و معالجے کے لئے شری مہاراجہ ہری سنگھ اسپتال منتقل کیا گیا، تاہم 65 سالہ معمر شہری جس کی شناخت محمد اسلم ساکن مخدوم صاحب سری نگر کے بطور ہوئی ہے جانبر نہ ہو سکا۔ ذرائع کے مطابق پولیس اور سی آر پی ایف کے سینئر آفیسران جائے موقع پر پہنچے اور حالات کا جائزہ لیا۔


صدر اسپتال سری نگر کے سپر انٹنڈنٹ ڈاکٹر کنول جیت نے یو این آئی اردو کو بتایا کہ 21 زخمیوں کو ایس ایم ایچ ایس اسپتال لایا گیا۔ انہوں نے بتایا کہ ایک معمر شہری جس کی شناخت محمد اسلم ساکن مخدوم صاحب کے بطور ہوئی ہے زخموں کی تاب نہ لا کر چل بسا، اُن کے مطابق اسپتال میں زیر علاج باقی زخمیوں کی حالت قدرے مستحکم ہے۔ دریں اثنا حملے کے فوراً بعد سیکورٹی فورسز نے پورے علاقے کو محاصرے میں لے کر حملہ آوروں کی تلاش شروع کر دی ہے۔

ذرائع نے بتایا کہ امیرا کدل سری نگر میں گرینیڈ حملے کے بعد شہر میں سیکورٹی صورتحال کا از سر نو جائزہ لیا جا رہا ہے۔ معلوم ہوا ہے کہ گرینیڈ حملے کے بعد پورے شہر میں سیکورٹی فورسز کو مستعد رہنے کے احکامات صادر کئے گئے ہیں جبکہ جگہ جگہ اضافی نفری بھی تعینات کی گئی ہے تاکہ امکانی حملوں کو رونما ہونے سے پہلے ہی ٹالا جاسکے۔ ذرائع نے بتایا کہ حملہ آوروں کی شناخت کے لئے سی سی ٹی وی فوٹیج کو کھنگالا جارہا ہے تاکہ جلد ازجلد اُنہیں گرفتار کیا جاسکے۔


پولیس کے ایک سینئر آفیسر نے بتایا کہ امیرا کدل سری نگر میں ہوئے گرینیڈ حملے کے بعد سیکورٹی کو مستعد رہنے کے احکامات صادر کئے گئے ہیں۔ انہوں نے بتایا کہ شہر کے داخلی اور خارجی راستوں پر سیکورٹی فورسز کی تعیناتی عمل میں لائی گئی ہے اور کسی بھی گاڑی کو بغیر تلاشی کے آگے جانے کی اجازت نہیں دی جارہی ہیں۔ اُن کے مطابق سیول لائنز کے ساتھ ساتھ پائین علاقوں میں بھی سیکورٹی فورسز کو چوکس رہنے کی ہدایت دی گئی ہے۔ انہوں نے کہا کہ حساس علاقوں میں سیکورٹی فورسز نے ناکے لگائے ہیں جہاں پر گاڑیوں کی باریک بینی سے تلاشی لی جا رہی ہیں۔

ادھر سری نگر پولیس کی جانب سے جاری کئے گئے ایک بیان میں کہا گیا ہے کہ امیرا کدل کے بھیڑ بھاڑ والے مارکیٹ میں اتوار کے روز ایک گرنیڈ داغا گیا۔ انہوں نے بتایا کہ دہشت گردی کے اس واقعے میں نوہٹہ کا رہنے والا ایک معمر شہری از جان ہوا جبکہ ایک دوشیزہ کی حالت بھی تشویشناک بنی ہوئی ہے۔ اُن کے مطابق گرینیڈ کے اس حملے میں ایک پولیس اہلکار اور 23 عام شہری زخمی ہوئے ہیں جن کی حالت اسپتال میں مستحکم بتائی جا رہی ہے۔ قابل ذکر ہے کہ سنڈے مارکیٹ کے پیش نظر اتوار کے روز لالچوک، ہری سنگھ ہائی اسٹریٹ اور امیرا کدل میں لوگوں کی بڑی تعداد شاپنگ کرنے کے لئے وارد ہوتے ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔