جلد ملنے والا ہے ’فاسٹیگ‘ سے چھٹکارا، براہ راست بینک اکاؤنٹ سے کٹے گا ٹول

ہندوستان کے قومی شاہراہوں پر سفر کرنے والی گاڑیوں سے فاسٹیگ کے ذریعہ ٹول ٹیکس وصول کرنے کے انتظام کو جلد ہی ختم کیا جا سکتا ہے۔ دراصل پارلیمنٹ کی اسٹینڈنگ کمیٹی نے ٹول ٹیکس وصول کرنے کے لیے ملک کی لاکھوں گاڑیوں میں لگائے گئے فاسٹیگ کو ہٹانے کی سفارش کرتے ہوئے شاہراہوں پر ٹول ٹیکس وصولنے کے نظام کو اس طرح سے ڈیزائن کرنے کی سفارش کی ہے تاکہ جی پی ایس کے ذریعہ سیدھے بینک اکاؤنٹ سے ہی یہ رقم لی جا سکے۔

ٹرانسپورٹیشن، سیاحت اور ثقافت سے متعلق پارلیمانی اسٹینڈنگ کمیٹی کا یہ ماننا ہے کہ جی پی ایس کے ذریعہ سیدھے بینک اکاؤنٹ سے ٹول ٹیکس وصول کرنے کے اس انتظام سے ان لوگوں کو بہت فائدہ ہوگا جو فاسٹیگ آن لائن ریچارج کرانے کی تکنیک سے اچھی طرح واقف نہیں ہیں۔ کمیٹی کا یہ بھی ماننا ہے کہ اس سسٹم کو ملک بھر میں نافذ کرنے سے ٹول بوتھوں پر لوگوں کو ہونے والی تاخیر کو ختم کرنے میں مدد ملے گی۔ ایندھن خرچ میں بھی بچت ہوگی اور اس کے ساتھ ہی قومی شاہراہوں پر سفر میں لگنے والے وقت کو بھی کم کیا جا سکے گا۔

’ملک کی تعمیر میں شاہراہوں کا کردار‘ پر پارلیمنٹ میں رپورٹ پیش کرتے ہوئے ملک میں جی پی ایس پر مبنی ٹولنگ شروع کرنے سے متعلق وزارت کے ذریعہ کی جا رہی پیش قدمی کی تعریف کرتے ہوئے پارلیمانی کمیٹی نے کہا کہ اس سے قومی شاہراہوں پر ٹول پلازہ بنانے کے لیے بنیادی ڈھانچہ تیار کرنا نہیں پڑے گا۔

حکومت نے پارلیمانی کمیٹی کے مشورے پر عمل کرنے کی یقین دہانی کرتے ہوئے یہ جانکاری دی کہ این ایچ اے آئی مشورہ کنندہ کی شناخت کرنے کے عمل میں ہی جو سیٹلائٹ پر مبنی ٹولنگ کی عمل آوری کے لیے خاکہ تیار کرے گا تاکہ پارلیمانی کمیٹی کی سفارش کے مطابق قومی شاہراہوں کا استعمال کرنے والوں کو فائدہ پہنچایا جا سکے۔

دراصل ٹول پلازہ پر گاڑیوں کی طویل قطار کو کم کرنے کے لیے فاسٹیگ سسٹم کی شروعات کی گئی تھی جس سے گاڑیوں کا ٹول ٹیکس فاسٹیگ کے ذریعہ ہی کٹ جایا کرتا ہے اور گاڑیوں کو ٹول پلازہ پر رکنے کی ضرورت نہیں پڑتی ہے لیکن اب اس میں آ رہی کئی طرح کی دقتوں کو دیکھتے ہوئے ہی پارلیمانی کمیٹی نے جی پی ایس پر مبنی ٹول سسٹم کی شروعات کرنے کی سفارش کی ہے۔