سنتوکھ سنگھ کے انتقال پر سونیا گاندھی نے جاری کیا تعزیتی پیغام، بھارت جوڑو یاترا 24 گھنٹے کے لیے ملتوی

کانگریس رکن پارلیمنٹ سنتوکھ سنگھ کے انتقال پر یو پی اے چیئرپرسن سونیا گاندھی نے اظہارِ غم کرتے ہوئے سنتوکھ کی اہلیہ کمل جیت کے نام تعزیتی پیغام لکھا ہے۔

<div class="paragraphs"><p>سنتوکھ سنگھ، تصویر آئی اے این ایس</p></div>

سنتوکھ سنگھ، تصویر آئی اے این ایس

user

قومی آوازبیورو

پنجاب میں کانگریس کی ’بھارت جوڑو یاترا‘ کے دوران رکن پارلیمنٹ سنتوکھ سنگھ چودھری کا دل کا دورہ پڑنے سے انتقال ہو گیا۔ 75 سالہ سنتوکھ کے انتقال پر یو پی اے چیئرپرسن سونیا گاندھی نے انتہائی غم و اندوہ کا اظہار کیا ہے۔ انھوں نے سنتوکھ سنگھ کی اہلیہ کمل جیت کور کے نام تعزیتی پیغام بھی لکھا ہے جس میں غمزدہ کنبہ کے تئیں اپنی ہمدردی کا اظہار کیا ہے۔

اپنے تعزیتی پیغام میں سونیا گاندھی نے لکھا ہے ’’محترمہ کمل جیت کور جی، کانگریس کے سینئر لیڈر اور آپ کے شوہر محترم سنتوکھ سنگھ چودھری جی کے کانگریس کی تاریخی بھارت جوڑو یاترا کے دوران ہارٹ اٹیک سے اچانک انتقال کی خبر سن کر مجھے بہت افسوس ہوا۔ میں سمجھ سکتی ہوں کہ کنبہ کے دیگر اراکین کے ساتھ ساتھ، خصوصاً آپ کے لیے کئی دہائیوں کی ازدواجی زندگی میں ساتھ رہنے کے بعد اس عمر میں اچانک ان سے بچھڑ جانا کتنا تکلیف دہ ہے۔ پھر بھی قدرت کے قانون کو ماننا پڑتا ہے اور برداشت کرنا پڑتا ہے۔‘‘


سونیا گاندھی اپنے پیغام میں آگے لکھتی ہیں کہ ’’مجھے یقین ہے کہ اس تکلیف کو آپ اسی نظریہ (قدرت کا قانون) سے دیکھ کر صبر کی کوشش کریں گی۔ وہ کانگریس کے نظریہ کے تئیں وقف اور وفادار رہے، زندگی بھر کانگریس کے نظریہ کے اصولوں اور اقدار پر چلتے ہوئے پارٹی اور سماج کی خدمت کی۔ ان کا انتقال ناقابل تلافی نقصان ہے۔ اس تکلیف کے لمحہ میں میں آپ کے اور کنبہ کے تئیں اپنی دلی ہمدردی کا اظہار کرتی ہوں۔‘‘

واضح رہے کہ آج صبح بھارت جوڑو یاترا کے دوران کانگریس رکن پارلیمنٹ سنتوکھ سنگھ چودھری کا اچانک دل کا دورہ پڑنے سے انتقال ہو گیا۔ اس خبر سے کانگریس کے سرکردہ لیڈران صدمے میں ہیں اور پارٹی صدر ملکارجن کھڑگے، راہل گاندھی، پرینکا گاندھی سمیت دیگر کانگریس لیڈران نے اظہارِ غم کیا ہے۔ سنتوکھ سنگھ کے اچانک انتقال کے بعد پارٹی نے ہفتہ کے روز چل رہی بھارت جوڑو یاترا کو ملتوی کرنے کا بھی اعلان کر دیا ہے۔


کانگریس لیڈر جئے رام رمیش نے ایک پریس کانفرنس کر کے کہا ہے کہ جالندھر سے کانگریس رکن پارلیمنٹ سنتوکھ سنگھ چودھری کا آج صبح بھارت جوڑو یاترا کے دوران اچانک دل کا دورہ پڑنے سے انتقال ہو گیا۔ ان کے احترام میں بھارت جوڑو یاترا 24 گھنٹے کے لیے ملتوی رہے گی۔ یاترا کل دوپہر خالصا کالج گراؤنڈ، جالندھر سے پھر شروع ہوگی۔ انھوں نے مزید کہا کہ اتوار کو جالندھر میں ہونے والی راہل گاندھی کی پریس کانفرنس بھی رد کر دی گئی ہے۔ راہل گاندھی کی پریس کانفرنس اب 17 جنوری کو ہوشیار پور میں ہوگی۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔