سونیا گاندھی اور راہل گاندھی کی فلائٹ میں آئی تکنیکی خامی، بھوپال کے راجہ بھوج ایئرپورٹ پر ایمرجنسی لینڈنگ

کانگریس کی سابق صدر سونیا گاندھی اور راہل گاندھی کی فلائٹ میں آچانک تکنیکی خامی آنے کے بعد اس کی بھوپال واقع راجہ بھوج ایئرپورٹ پر ایمرجنسی لینڈنگ کرائی گئی ہے۔ سونیا اور راہل بنگلورو میں اپوزیشن پارٹیوں کی دو روزہ میٹنگ ختم ہونے کے بعد چارٹرڈ فلائٹ سے دہلی لوٹ رہے تھے جب بھوپال میں ایمرجنسی لینڈنگ کرانی پڑی۔

راہل گاندھی کے ذاتی اسٹاف نے طیارہ کی ایمرجنسی لینڈنگ سے متعلق تصدیق کی ہے۔ مدھیہ پردیش کانگریس کمیٹی کے نائب صدر اور تنظیم انچارج راجیو سنگھ نے بتایا کہ رکن اسمبلی عارف مسعود، پی سی شرما ایئرپورٹ پر پہنچ گئے ہیں۔ راہل-سونیا بھوپال ایئرپورٹ کے وی آئی پی لاؤنج کے اندر ہیں۔

کانگریس لیڈروں سے ملی جانکاری کے مطابق اب راہل-سونیا 9.30 بجے انڈیگو کی فلائٹ سے دہلی جائیں گے۔ اس سلسلے میں فی الحال کچھ بھی جانکاری حاصل نہیں ہو سکی ہے کہ جس چارٹرڈ ایئرکرافٹ سے سونیا-راہل دہلی کے لیے روانہ ہوئے تھے، اس میں کس طرح کی تکنیکی خامی آئی۔