راہل گاندھی سے متعلق بیان دے کر پھنس گئیں اسمرتی ایرانی، ویڈیو شیئر کر کانگریس نے جھوٹ سے اٹھایا پردہ

مرکزی وزیر اسمرتی ایرانی ان دنوں اپنے بیانات کو لے کر خوب سرخیوں میں ہیں۔ انجانے یا قصداً انھوں نے حال میں کئی ایسے بیانات دیئے ہیں، جس کا سچائی سے کوئی سروکار نہیں ہے۔ اس کے لیے انھیں سوشل میڈیا پر ٹرولنگ کا بھی شکار ہونا پڑا۔ اسمرتی ایرانی کا تازہ بیان راہل گاندھی سے متعلق ہے جو کہ اس وقت بھارت جوڑو یاترا کی قیادت کر رہے ہیں۔ اسمرتی ایرانی نے راہل گاندھی پر الزام عائد کیا ہے کہ انھوں نے کنیاکماری سے یاترا شروع کرنے سے پہلے سوامی وویکانند کے دَرشن نہیں کیے۔

مرکزی وزیر نے اپنی ایک تقریر میں کہا کہ ’’کنیا کماری سے بھارت جوڑو یاترا کی شروعات کرنے والے راہل گاندھی کو پہلے سوامی وویکانند کو پرنام کرنا چاہیے تھا۔‘‘ ان کے اس بیان پر کانگریس نے فوری رد عمل پیش کرتے ہوئے ایک ویڈیو شیئر کیا ہے جس میں راہل گاندھی وویکانند کے مجسمہ کے سامنے کھڑے ہیں۔ اس ویڈیو کے ذریعہ اسمرتی ایرانی کو جھوٹی ثابت کرنے کی کوشش کی گئی ہے۔

کانگریس کے کئی لیڈران نے اسمرتی ایرانی کے جھوٹے بیان کو سخت تنقید کا نشانہ بنایا ہے۔ کانگریس لیڈر جئے رام رمیش نے تو میڈیا سے بات چیت کے دوران طنزیہ انداز اختیار کرتے ہوئے کہا کہ ’’7 تاریخ کو راہل گاندھی جی 3 بجے کہاں تھے، کس اسمارک میں تھے، اس کا جواب اسمرتی ایرانی کو دینا چاہیے۔ اگر انھیں نیا چشمہ چاہیے تو میں چشمہ دینے کو بھی تیار ہوں۔‘‘ جئے رام رمیش نے ساتھ ہی کہا کہ بی جے پی کبھی کنٹینر، کبھی ٹی شرٹ، کبھی جوتوں کو ایشو بنانا چاہتی ہے، اس سے صاف ہے کہ بی جے پی گھبرائی ہوئی ہے۔ انھوں نے مزید کہا کہ بی جے پی والے پریشان ہیں اور ان کی جھوٹ کی فیکٹری اوور ٹائم چل رہی ہے۔

کانگریس لیڈر بی وی شرینواس نے بھی اس سلسلے میں ایک ٹوئٹ کیا ہے جس میں اسمرتی ایرانی کو مخاطب کرتے ہوئے لکھا ہے کہ ’جھوٹ بولتے ہوئے شرم نہیں آتی‘۔ بی وی شرینواس نے اپنے پوسٹ میں راہل گاندھی اور اسمرتی ایرانی کی ویڈیو بھی شیئر کی ہے۔ اس میں ایک طرف اسمرتی ایرانی جہاں راہل گاندھی پر الزام لگا رہی ہیں، وہیں دوسری طرف ویڈیو میں راہل گاندھی سوامی وویکانند کے مجسمہ کو سلام پیش کرتے نظر آ رہے ہیں۔ انھوں نے اپنے ٹوئٹ میں لکھا ہے ’’چل جھوٹی، اتنا ’سلی‘ جھوٹ بولتے ہوئے شرم نہیں آتی؟‘‘

واضح رہے کہ کانگریس کے سابق صدر راہل گاندھی نے ’بھارت جوڑو یاترا‘ شروع کرنے سے پہلے کنیاکماری میں وویکانند راک میموریل، ترووَلور اسٹیچو اور کامراج میموریل بھی گئے۔ یہاں انھوں نے سوامی وویکانند کو خراج عقیدت پیش کیا اور پھر سفر کا آغاز کیا۔