شولا پور: پولیس کمشنر نے اپنے گھر پر معصوم روزہ داروں کے لئے افطار پارٹی کا اہتمام کیا

ممبئی: ایک ایسے وقت میں جب ملک میں کہیں افطار پارٹی کے انعقاد کے نام پر سیاست ہو رہی ہے اور کہیں یونیورسٹی کیمپس میں خیرسگالی کے جذبے کے تحت منعقد کی جانے والی افطار پارٹی کے خلاف محاز آرائی کے ذریعے ماحول خراب کرنے کی کوشیش کی جا رہی ہے، مہاراشٹر کے شولارپور کے پولیس کمشنر ہریش بیجل نے ایک انوکھی پہل کرتے ہوئے محبت و اخوت کی ایک نادر مثال قائم کرتے ہوئے اپنی سرکاری رہائش گاہ پر معصوم روزہ داروں کے لیے افطار پارٹی کا اہتمام کیا۔

اس افطار پارٹی میں شولاپور شہر کے 100 سے زیادہ معصوم روزہ داروں نے شرکت کی۔ پولیس کمشنر ہریش بیجل کو جب یہ پتہ چلا کہ بچے بھی ماہ رمضان کا روزہ رکھتے ہیں تو ان کے دل میں معصوموں کے لئے افطار پارٹی کا اہتمام کرنے کا خیال پیدا ہوا۔ اس افطار کا اہتمام شب قدر کے 26 ویں روزے کو کیا گیا۔

شولاپور کے سوشل ہائی اسکول کے ہیڈ ماسٹر آصف اقبال نے قومی آواز کو بتایا کہ بڑوں کے لئے تو افطار پارٹی کا اہتمام اکثر کیا جاتا ہے لیکن شولاپور کے پولیس کمشنر ہریش بیجل نے بچوں کی افطار پارٹی کا اہتمام کرتے ہوئے ایک نئی مثال قائم کی ہے۔ انہوں نے کہا کہ افطار پارٹی میں زیادہ تر اردو اسکول کے طلبہ و طالبات نے شرکت کی۔ بچوں میں ایک بڑی تعداد سوشل ہائی اسکول شولاپور کے طلبہ و طالبات کی تھی۔

افطاری کے نظم کے بعد احاطے میں نماز کا بھی اہتمام کیا گیا۔ اس موقع پر روزہ دار طالب علم ابراہیم شیخ نے اذان پڑھی اور دوسرے روزہ دار بچے سعد شیخ نے نماز پڑھائی، جبکہ سمیر سید نے دعا کرائی۔ اس موقع پر ملک کی امن و سلامتی کے لئے دعائیں کی گئیں۔

آصف اقبال نے بتایا کہ پہلی جماعت سے چوتھی جماعت کے بچوں نے اس افطار پارٹی میں شرکت کی اور ان میں بیشتر بچے ایسے تھے جنہوں نے پہلی بار ماہ رمضان کے مکمل روزے رکھے ہیں۔ اس موقع پر موجود بچوں کے والدین نے افطار پارٹی کے انعقاد پر کمشنر صاحب کا شکریہ ادا کیا۔