جھارکھنڈ میں ٹرین اور ٹرک کے درمیان شدید ٹکر، کئی لوگوں کے زخمی ہونے کا اندیشہ

جھارکھنڈ کے دیوگھر ضلع واقع جسیڈیہہ علاقہ میں ایک ریلوے پھاٹک پر شدید حادثہ پیش آیا ہے۔ یہاں ایک ٹرین اور ٹرک کے درمیان سخت ٹکر ہو گئی، جس میں کئی لوگوں کے زخمی ہونے کا اندیشہ ظاہر کیا جا رہا ہے۔ حادثہ اُس وقت پیش آیا جب ٹرک ریلوے پھاٹک پار کرنے کی کوشش کر رہا تھا، تبھی ٹرین آ گئی اور ٹرک کے پچھلے حصہ میں ٹکر مارتی ہوئی رُک گئی۔ اچھی بات یہ رہی کہ ٹرین کے لوکو پائلٹ نے پہلے سے ہی بریک لگانا شروع کر دیا تھا، جس کی وجہ سے ٹکر کے فوراً بعد ہی ٹرین رک گئی، ورنہ حادثہ مزید خوفناک ہو سکتا تھا۔

میڈیا رپورٹس کے مطابق حادثہ جمعرات کی صبح دیوگھر ضلع کے جسیڈیہہ-ہاوڑہ مین لائن پر پیش آیا، جہاں ایک ٹرین اور ٹرک کی ٹکر سے افرا تفری کا ماحول پیدا ہو گیا۔ اس ٹکر میں 2 موٹر سائیکل کو بھی شدید نقصان پہنچا ہے۔ ایک موٹر سائیکل سوار کے سنگین طور پر زخمی ہونے کی اطلاع ہے، جس کا علاج اسپتال میں چل رہا ہے۔ باقی زخمیوں کے خطرہ سے باہر ہونے کی جانکاری سامنے آ رہی ہے۔

حادثہ کے فوراً بعد سیکورٹی کے لحاظ سے ڈاؤن لائن اور اَپ لائن دونوں پر ٹرینوں کی آمد و رفت روک دی گئی۔ حادثہ صبح تقریباً 10 بجے پیش آیا اور ایک گھنٹہ سے زیادہ وقت تک ریل کی آمد و رفت متاثر رہی۔ اس حادثہ کی جانکاری ملتے ہی آسنسول ریلوے ڈویزن کے سبھی افسران موقع پر پہنچے۔ انھوں نے وہاں کے ریل افسران سے حادثہ کی مکمل جانکاری لی۔ ریلوے انتظامیہ نے ٹریک کو فوراً صاف کیا اور ٹرینوں کی آمد و رفت بحال کی۔

حادثہ کی خبر ملتے ہی آر پی ایف اور جی آر پی کی ٹیمیں فوری طور پر جائے وقوع پر پہنچ گئیں۔ سیکورٹی فورسز نے بھی موقع پر موجود بھیڑ کو قابو میں کرتے ہوئے راحت و بچاؤ کام شروع کیا۔ افسران کے مطابق ترجیحی بنیاد پر ٹریک کو صاف کر حالات معمول پر لائے گئے۔ اب پولیس اس بات کی جانکاری حاصل کرنے میں مصروف ہے کہ پھاٹک بند ہونے کے باوجود ٹرک ریلوے ٹریک پر کیسے پہنچا۔