مرکز نے ریاستوں کو کیا خبردار، 27 اضلاع میں تیزی سے پھیل رہا کورونا

مرکزی حکومت نے بتایا کہ گزشتہ دو ہفتوں میں 27 اضلاع نے کووڈ-19 کی پازیٹویٹی شرح میں اضافہ درج کیا ہے اور ان پر سخت نظر رکھی جا رہی ہے۔ مرکز نے واضح کیا کہ وبا کے خلاف لڑائی میں ملک سنجیدگی کے ساتھ متحد کھڑا ہے۔ مرکزی صحت سکریٹری راجیش بھوشن نے ریاستوں کو اپنے خط میں خصوصاً 27 اضلاع میں کووڈ کے قہر کو لے کر متنبہ کیا ہے۔

کووڈ انفیکشن ایک بار پھر سے بے قابو ہو رہا ہے۔ عالم یہ ہے کہ ریاستوں اور مرکز کے زیر انتظام خطوں کے 27 اضلاع میں گزشتہ دو ہفتہ میں انفیکشن کی شرح میں اضافہ دیکھنے کو ملا ہے۔ خط میں کہا گیا ہے کہ کئی اضلاع تو ایسے ہیں جہاں پر انفیکشن کی شرح 10 فیصد سے بھی اوپر پہنچ گئی ہے، وہیں دیگر اضلاع میں یہ پانچ سے 10 فیصد کے درمیان ہے۔

خط میں زیادہ انفیکشن کی شرح والے 27 اضلاع پر نظر بنائے رکھنے کو کہا گیا ہے۔ اس خط میں مرکز کی طرف سے کئی ہدایات دی گئی ہیں۔ خط میں کہا گیا ہے کہ ’’سات ریاستوں اور مرکز کے زیر انتظام خطوں کے 19 اضلاع میں گزشتہ دو ہفتوں میں 5 فیصد سے 10 فیصد کے درمیان پازیٹویٹی شرح درج کی گئی ہے۔ اس طرح ان 27 اضلاع پر سخت نگرانی رکھنے کی ضرورت ہے۔‘‘

خط کے مطابق سبھی ریاستوں اور مرکز کے زیر انتظام خطوں کے لیے جاری ہدایات کے مطابق ضلع سطح کی ترکیبوں کے ساتھ حالات پر سخت نظر رکھنا لازمی ہے۔ خط میں کہا گیا ہے کہ کسی بھی ضلع میں کووڈ کے معاملوں میں اضافہ یا پازیٹویٹی شرح میں اضافہ درج کیے جانے کے بعد مقامی سطح پر کنٹرو شروع کیا جانا چاہیے۔

خط میں کہا گیا ہے کہ جن اضلاع میں انفیکشن کی شرح بے قابو ہو رہی ہے، ان علاقوں کو منتخب کر وہاں پر کووڈ سے بچاؤ کے لیے سخت قدم اٹھانے کی ضرورت ہے۔ ضرورت پڑنے پر رات کا کرفیو، لوگوں کے اکٹھا ہونے پر روک، شادی یا دیگر تقاریب میں بھیڑ پر پابندی لگانے کو بھی کہا گیا ہے۔

اس کے علاوہ ریاستوں کو آر ٹی پی سی آر جانچ بڑھانے پر دھیان دینے کو بھی کہا گیا ہے۔ بیرون ممالک سے آنے والوں کی نگرانی میں کوئی لاپروائی نہیں برتنے کی ہدایت دی گئی ہے۔ متاثرہ مریضوں اور ان کے رابطہ میں آنے والوں کی جانچ و نگرانی کرنے کی بھی ہدایت ہے۔ ساتھ ہی ریاستوں کو کووڈ سے دفاع کے لیے طے کردہ ضابطوں پر سختی سے عمل کرانے کی ہدایت جاری کرنے کو کہا گیا ہے۔