سنگھ ملک کو کمزور کر کے چند صنعت کاروں کا ملک بنانے کی کوشش کر رہی ہے: راہل

کانگریس کے سابق صدر راہل گاندھی نے بی جے پی اور سنگھ پر زوردار حملہ کرتے ہوئے ان پر نفرت کی سیاست کرکے ملک کو کمزور کرنے اور چار پانچ صنعت کاروں کا ملک بنانے کی کوشش کرنے کا الزام عائد کرتے ہوئے کہا کہ کانگریس پوری طاقت سے اس کی مخالفت جاری رکھے گی۔

راہل گاندی نے غریب بے زمین خاندانوں کو براہ راست مالی مدد فراہم کرنے کے لیے چھتیس گڑھ حکومت کی ’راجیو گرامین کرشی مزدور نیا ئےیوجنا ‘شروع کرنے اور وردھا کے خطوط پر بننے والے گاندھی 'سیواگرام اور 'چھتیس گڑھ امر جوان جیوتی کا سنگ بنیاد رکھنے کے بعد اس موقع پر منعقدہ پروگرام سے خطاب کرتے ہوئے کہا کہ بی جے پی اور سنگھ کا نظریہ نفرت پھیلا کر ملک کو کمزور کرنا ہے۔

انہوں نے کل پارلیمنٹ میں دیے گئے بیان کو دہراتے ہوئے کہا کہ بی جے پی اور سنگھ نے ملک کو امیر اور غریب کے دو ملکوں میں تقسیم کر دیا ہے۔انہوں نے کہا کہ امیروں کے ملک میں سب کچھ ہے لیکن ملک میں غربت، مہنگائی اور بے روزگاری جیسے مسائل ہیں۔انہوں نے کہا کہ بی جے پی اور سنگھ کے لوگ پوچھتے ہیں کہ 70 سال میں کیا ہوا،وہ ایسا کر کے کسانوں اور مزدوروں کی توہین کرتے ہیں۔ ملک کی ترقی غریبوں، مزدوروں اور کسانوں کی مرہون منت ہے۔

مسٹر گاندھی نے کہا کہ 100 امیر لوگوں کے پاس ملک کی 40 فیصد دولت ہے۔بی جے پی اور سنگھ ملک کو چار سے پانچ صنعتکاروں کا ب ملک نانا چاہتے ہیں، لیکن ایسا نہیں ہونے دیں گے۔انہوں نے کہا کہ کثرت میں وحدت ہی ملک کی طاقت ہے۔ ملک ایک گلدستے کی طرح ہے جہاں مختلف زبان، ثقافت اور تاریخ ہے،یہی ہمارے ملک کی خوبصورتی ہے لیکن بی جے پی اورسنگھ اپنا نظریہ سب پر مسلط کرنا چاہتی ہے۔ہندوستان کسی ایک سوچ کا نہیں ہو سکتا۔

انہوں نے چھتیس گڑھ کا ذکر کرتے ہوئے کہا کہ ہماری حکومت کسانوں، مزدوروں سمیت تمام طبقوں کے مفاد میں مسلسل کام کر رہی ہے، کانگریس نے انتخابات میں جو وعدہ کیا تھا، اس سے بڑھ کر وہ وعدہ پورا ہوا۔

مسٹر گاندھی نے کہا کہ وہ شروع سے کہہ رہے ہیں کہ کسانوں اور مزدوروں کی جیبوں میں پیسہ ڈالنے سے معیشت مضبوط ہوگی، ہماری چھتیس گڑھ کی حکومت نے کسانوں اور مزدوروں کی جیبوں میں پیسہ ڈالا، اس کا اثر یہ ہوا کہ کورونا کے مشکل دور میں چھتیس گڑھ کی جی ڈی پی بہت اچھی رہی۔انھوں نے وزیر اعلی بھوپیش بگھیل کی بہت تعریف کی اور ان کے کابینہ کے ساتھیوں کو بھی اچھے کام کے لیے مبارکباد دی۔