ووٹروں کو پیسہ دیتے ہوئے بی جے پی کارکنان کا ویڈیو وائرل

گجرات میں اپوزیشن کانگریس نے ایک ویڈیو وائرل ہونے کے بعد منگل کو ریاست کے چیف الیکشن کمشنر (سی ای او) کے سامنے ایک شکایت درج کرائی ہے۔ ویڈیو میں ایک بی جے پی کارکن ووٹ دے کر لوٹ رہے ووٹروں کو پیسے دیتا نظر آ رہا ہے۔ سی ای او ڈاکٹر مرلی کرشن نے ضلع الیکشن افسران کی شکایت کے بعد جانچ کا حکم دے دیا ہے۔

کانگریس ترجمان جے راج سنگھ پرمار نے اس وائرل ویڈیو کے تعلق سے شکایت درج کرائی ہے۔ ویڈیو میں بی جے پی کے ایک کارکن کو ووٹ ڈالنے کے بعد لوٹ رہے ووٹروں کو پیسے دیتے دکھایا گیا ہے۔ ویڈیو کرجن اسمبلی حلقہ کے ایک پولنگ سنٹر کا ہے۔ کانگریس کا الزام ہے کہ بی جے پی لیڈروں و کارکنوں نے کرجن سیٹ کے انٹولا اور گوسیندرا گاؤں میں ووٹروں کو پیسے تقسیم کیے۔ کانگریسی لیڈروں کی شکایت کے بعد کرجن سیٹ کے نوڈل افسر بی بی چودھری ٹیم سمیت جانچ کے لیے روانہ ہو گئے ہیں۔ کانگریس کارکنان نے نوٹ تقسیم کرتے ہوئے کچھ تصویریں بھی جاری کی ہیں۔