الیکشن کے لیے آر جے ڈی کا نیا نعرہ ہوگا 'اس بار تیجسوی طے ہے'، ویڈیو ریلیز

بہار اسمبلی انتخاب کے پہلے مرحلہ کی ووٹنگ کے پیش نظر انتخابی سرگرمیاں تیز ہو گئی ہیں۔ انتخابی تشہیر کے لیے پارٹیاں اپنا نعرہ اور کیمپین ویڈیو بھی لگاتار ریلیز کر رہی ہیں۔ پیر کے روز اہم اپوزیشن پارٹی راشٹریہ جنتا دل (آر جے ڈی) نے بھی کیمپین ویڈیو ریلیز کر دیا ہے جس میں نتیش حکومت پر زوردار حملہ کیا گیا ہے۔ ساتھ ہی اس ویڈیو میں آر جے ڈی نے نیا نعرہ 'اس بار تیجسوی طے ہے' دیا ہے۔

پیر کے روز ایک پریس کانفرنس میں آر جے ڈی کے قومی ترجمان منوج جھا نے ریاستی صدر جگدانند سنگھ کے ساتھ پارٹی کی انتخابی تشہیر کے لیے ویڈیو لانچ کیا۔ اس میں جے ڈی یو کی نتیش حکومت کو ناکام بتایا گیا ہے۔ اس گانے کو 'تیجسوی بھوا' نام سے جاری کیا گیا ہے۔ آر جے ڈی نے ایک ٹوئٹ کے ذریعہ کہا کہ "نہ بھولیں گے، نہ بھولنے دیں گے۔ جملے بازوں کی ایک نہیں چلنے دیں گے۔ ابکی بار چپ چاپ لالٹین چھاپ۔"

واضح رہے کہ بہار اسمبلی انتخاب کے لیے آر جے ڈی کی مہم نے بھی زور پکڑ لی ہے۔ آر جے ڈی کے علاوہ مہاگٹھ بندھن میں شامل کانگریس نے پہلے ہی اپنے اسٹار کیمپینرس کی فہرست جاری کر دی ہے جس میں سونیا گاندھی، راہل گاندھی، پرینکا گاندھی، ڈاکٹر منموہن سنگھ سمیت کئی قومی لیڈروں کے نام شامل ہیں۔ اب دھیرے دھیرے ان سبھی لیڈروں کے بہار پہنچنے کا سلسلہ شروع ہوگا۔ کانگریس نے کافی پہلے سے ہی 'ورچوئل مہم' شروع کر رکھی ہے۔