مرکزی کابینہ میں رد و بدل، وزارت مالیات پیوش گویل کے حوالے

مرکزی وزیر پیوش گویل

اسمرتی ایرانی سے اطلاعات و نشریات کی وزارت لے کر اسپورٹس کے وزیر راج وردھن سنگھ راٹھوڑ کے حوالے کر دیا گیا ہے۔

وزیر اعظم نریندر مودی نے 14 مئی کی شام مرکزی کابینہ میں رد و بدل کرتے ہوئے پیوش گیل کو وزارت مالیات کی ذمہ داری سونپ دی ہے۔ اطلاعات کے مطابق وہ ارون جیٹلی کے صحت یاب ہونے تک وزارت مالیات کے امور کو دیکھیں گے۔ ارون جیٹلی گزشتہ کچھ مہینے سے کڈنی کے مرض میں مبتلا تھے اور آج ایمس میں کڈنی ٹرانسپلانٹ کا کامیاب آپریشن ہوا ہے۔ پیوش گویل وزارت ریل پہلے کی طرح ہی سنبھالتے رہیں گے، وزارت مالیات کی اضافی ذمہ داری انھیں سونپی گئی ہے۔

وزارت کھیل کی ذمہ داری سنبھال رہے راج وردھن سنگھ راٹھوڑ کو اطلاعات و نشریات کی ذمہ داری دی گئی ہے۔ گزشتہ سال جولائی میں نائب صدر عہدہ کے لیے منتخب کیے جانے کے بعد ونکیا نائیڈو نے اس عہدہ سے استعفیٰ دے دیا تھا جس کے بعد سے اسمرتی ایرانی اطلاعات و نشریات کی وزارت سنبھال رہی تھیں۔ اسمرتی ایرانی کے پاس ٹیکسٹائل کی وزارت پہلے سے تھی اور اطلاعات و نشریات کی اضافی ذمہ داری انھیں سونپی گئی تھی۔ اب ان کے پاس صرف ٹیکسٹائل کی وزارت ہی رہے گی۔ ذرائع کے مطابق ایس ایس اہلووالیہ الیکترانکس کا محکمہ دیکھیں گے۔

سب سے زیادہ مقبول