مہاراشٹر میں تبدیلی مذہب کے ریکیٹ کا پردہ فاش، ایک امریکی سمیت تین ملزمین گرفتار

مہاراشٹر کے تھانے ضلع کے بھیونڈی علاقے میں مذہب کی تبدیلی کے ریکیٹ کا پردہ فاش کیا گیا ہے۔ پولیس نے اس معاملے میں ایک امریکی شہری سمیت تین افراد کو گرفتار کر لیا ہے۔ ملزمین پر مقامی باشندوں کو زبردستی عیسائیت اختیار کرنے پر اکسانے کے الزامات کے تحت کیس درج کیا گیا ہے۔

مقامی پولیس کے مطابق واقعہ بھیونڈی کے چمبپاڑہ علاقے کا ہے ۔ گرفتار ملزمین میں 58 سالہ امریکی شہری جیمز واٹسن کے علاوہ دو دیگر ہندوستانی 42 سالہ سیناتھ گنپتی سرپے اور 35 سالہ منوج کولہا شامل ہیں۔ جمعہ کی سہ پہر ملزمین نے مقامی گاؤں والوں کے ایک گھر کے باہر میٹنگ کی، جہاں انہوں نے دعا کروائی اور عیسائیت سے متعلق کتابیں تقسیم کیں۔

پولیس کا کہنا ہے کہ ملزمین نے گاؤں والوں کو یہ باور کرانے کی کوشش کی کہ عیسائیت اختیار کرنے سے ان کی تمام بیماریوں اور جسمانی تکالیف کا علاج ہو جائے گا۔ گاؤں والوں نے پولیس کو مطلع کیا، جس پر مقامی پولیس جائے وقوعہ پر پہنچی اور تینوں ملزمین کو گرفتار کر لیا۔ افسران نے بتایا کہ یہ ریکٹ طویل عرصے سے علاقے میں سرگرم تھا، مذہبی تبدیلی کے بہانے گاؤں والوں کو گمراہ کر رہا تھا۔ پولیس نے بتایا کہ ملزمین گاؤں والوں کو تبدیلی مذہب کے نام پر مذہبی کتابیں تقسیم کرتے اور دعا کرواتے تھے۔

بھیونڈی پولیس نے بتایا کہ گرفتار ملزمین پر اکسانے اور غیر قانونی مذہب تبدیلی کی کوشش کرنے کے الزامات لگائے گئے ہیں۔ پولیس نے ریکیٹ کی تحقیقات شروع کر دی ہے اور اس میں ملوث دیگر افراد کی نشاندہی کرنے کی کوشش کر رہی ہے۔ افسران نے کہا کہ زبردستی مذہب تبدیل کرنے کی کوئی بھی کوشش قابل سزا جرم ہے۔ پولیس کا کہنا ہے کہ ملزمین کو عدالت میں پیش کر کے ان کے خلاف کارروائی کی جا رہی ہے۔