راجستھان میں بھی کانگریس نے نبھایا وعدہ، کسانوں کا 2 لاکھ تک کا قرض معاف

کانگریس نے اپنے چناوی وعدے کے مطابق راجستھان میں بھی کسانوں کا دو لاکھ روپے تک کا قرض معاف کر دینے کا اعلان کیا ہے۔ اس سے قبل مدھیہ پردیش اور چھتیس گڑھ میں بھی کانگریس کی حکومتیں کسانوں کے قرض کو معاف کرنے کا اعلان کر چکی ہیں۔

غور طلب ہے کہ کانگریس کے صدر راہل گاندھی نے اپنی چناوی تقاریر میں کہا تھا کہ حکومت سازی کے 10 دنوں کے اندر کسانوں کا قرض معاف کر دیا جائے گا۔ اسی وعدے پر عمل کرتے ہوئے مدھیہ پردیش میں حلف لینے کے دو گھنٹوں کے اندر ہی وزیر اعلیٰ کمل ناتھ نے سب سے پہلے کسانوں کی قرض معافی کی فائل پر دستخط کئے تھے۔

اسی طرح چھتیس گڑھ میں بھی حلف برداری کے فوری بعد وزیر اعلیٰ بھوپیش بگھیل نے کسانوں کے حق میں قرض معافی کا اعلان کیا تھا۔ انہوں نے کہا تھا کہ اس سے تقریباً ساڑھے دس لاکھ کسانوں کو فائدہ ہوگا۔

قبل ازیں کانگریس کے صدر راہل گاندھی نے منگل کے روز کہا تھا کہ کانگریس 2019 کے اپنی انتخابی منشور میں کسانوں کی قرض معافی کا اعلان کرے گی۔ کانگریس صدر نے کہا تھا کہ ’’ہم نے جو کہا وہ کر کے دکھایا ہے۔ وزیر اعظم کو اس سے سبق لینا چاہئے۔ وزیر اعظم یہ جان لیں کہ جب تک وہ ملک بھر کے کسانوں کا قرض معاف نہیں کریں گے ہم انہیں چین سے سونے نہیں دیں گے۔‘‘