راجستھان: بی جے پی کی گروپ بندی پھر ظاہر، راجناتھ سنگھ کے سامنے اناؤنسمنٹ کو لے کر جھگڑا، دیکھیں ویڈیو

راجستھان میں اس سال اسمبلی انتخاب ہونے والا ہے۔ اس تعلق سے بڑے لیڈران کے دورے اور اجلاس کا انعقاد بھی شروع ہو چکا ہے۔ لیکن اس درمیان ایک بار پھر بی جے پی میں موجود گروپ بندی سامنے آ گئی ہے۔ دراصل 28 جون کو بالیسر میں مرکزی وزیر دفاع راجناتھ سنگھ جلسہ عام کو خطاب کرنے کے لیے پہنچے تھے۔ ٹھیک ان کے سامنے ہی اسٹیج پر اچانک مائک پر اناؤنسمنٹ کرنے والے کو لے کر رسہ کشی ہونے لگ گئی۔

سابق وزیر اعلیٰ وسندھرا راجے کے قریبی شیرگڑھ کے رکن اسمبلی بابو سنگھ راٹھوڑ نے کھڑے ہو کر مائک پر اناؤنس کرنے والے کو دھکا دے کر ہٹایا اور خود مائک پر قبضہ کر لیا۔ یہ بات شیخاوت گروپ کو ناگوار گزری۔ کچھ ہی وقت بعد شیخاوت گروپ کے لوگوں نے مائک چھین لیا۔ پھر تو اسٹیج پر دھکا مکی کی نوبت آ گئی۔ ایسا دیکھ کر مرکزی وزیر گجیندر سنگھ شیخاوت نے محاذ سنبھالا اور مائک کو پھر سے لگایا۔ اس کے بعد پھر خطاب کا عمل شروع ہوا۔

اب اس ہنگامے کی ویڈیو وائرل ہو گئی ہے اور بی جے پی کو کانگریس سمیت سبھی اپوزیشن پارٹیاں نشانہ بنا رہی ہیں۔ راجستھان کانگریس نے ویڈیو کے اپنے آفیشیل ٹوئٹر اکاؤنٹ سے شیئر کرتے ہوئے لکھا ہے کہ ٹکڑوں میں تقسیم راجستھان بی جے پی کی اندرونی چپقلش اب ایک دوسرے کے کپڑے پھاڑنے تک پہنچ گئی ہے۔ اس کے علاوہ وزیر اعلیٰ اشوک گہلوت کے او ایس ڈی ششی کانت شرما نے ٹوئٹ کیا ہے کہ ٹکڑے ٹکڑے میں تقسیم بی جے پی کے لیڈر اسٹیج پر اس طرح لڑ رہے ہیں تو ذرا تصور کیجیے بند کمروں میں یہ کس حد تک لڑتے ہوں گے؟