راہل غیر بی جے پی اتحاد کی قیادت کریں گے: لالو

یو این آئی

راہل گاندھی کے باضابطہ کانگریس پارٹی صدر مقرر ہونے میں بہت کم وقت بچا ہوا ہے ، اس سے قبل لالو پرساد یادو نے ایک بڑا اعلان کر دیا ہے۔

آر جے ڈی کے صدر لالو نے کہا ہے کہ 2019 کے عام انتخابات میں راہل گاندھی غیر بی جے پی جماعتوں کی طرف سے وزیر اعظم عہدے کےامیدوار ہوں گے۔ انہوں نے مزید کہا کہ میری اور میری پارٹی کی پوری حمایت راہل گاندھی کے ساتھ ہے۔

لالو نے کہا کہ گجرات انتخابات میں نریندر مودی رام کے نام پر ووٹ مانگ رہے ہیں۔ اس سے یہ ثابت ہو گیا ہے کہ بی جے پی وہاں ہار رہی ہے۔ لالو نے مزید کہا کہ بی جے پی رام کے نام پر ووٹ مانگ کر ووٹوں کے پولرائیزیشن کی کوشش کر رہی ہے۔

ادھر راہل گاندھی کا کانگریس پارٹی کا صدر مقرر ہونا تقریباً طے ہے۔ راہل کے حق میں داخل کئے گئے 89 کاغذات نامزگی کو صحیح پایا گیا ہے۔ اس طرح راہل گاندھی میدان میں اکیلے امید وار ہیں۔ نام واپس لینے کی آخری تاریخ 11 دسمبر ہے اور امید ہے کہ اسی روز انہیں کانگریس کا صدر بنائے جانے کا اعلان کر دیا جائے گا ہے۔

راہل گاندھی کو کانگریس کا نائب صدر جنوری 2013 کو بنایا گیا تھا۔ اب وہ اپنی والدہ سونیا گاندھی کا مقام لیں گے۔ سونیا گاندھی کو 1998 میں کانگریس کا صدر منتخب کیا گیا تھا اور وہ سب سے زیادہ مدت تک اس عہدے پر فائز رہی ہیں۔

اپنی خبریں ارسال کرنے کے لیے ہمارے ای میل پتہ contact@qaumiawaz.com کا استعمال کریں۔ ساتھ ہی ہمیں اپنے نیکمشوروں سے بھی نوازیں۔

سب سے زیادہ مقبول