دبئی ایئر شو میں جنگی طیارہ تیجس تباہ ہونے پر راہل گاندھی کا رد عمل آیا سامنے، پائلٹ کی موت پر اظہارِ غم

دبئی میں جاری ایئر شو کے دوران ہندوستان کا جنگی طیارہ تیجس اچانک زمین پر گر کر تباہ ہو گیا۔ اس حادثہ میں تیجس طیارہ اڑا رہے پائلٹ کی جائے وقوع پر ہی موت ہو گئی۔ تیجس ہندوستان کا پہلا سودیشی جنگی طیارہ ہے۔ اس حادثہ پر لوک سبھا میں حزب اختلاف کے قائد راہل گاندھی نے انتہائی غم و اندوہ ظاہر کیا ہے۔

راہل گاندھی نے سوشل میڈیا پلیٹ فارم ’ایکس‘ پر جاری ایک پوسٹ میں لکھا ہے کہ ’’دبئی ایئر شو میں تیجس کریش ہو گیا۔ حادثہ میں ہماری فضائیہ کے بہادر پائلٹ کی موت پر غمزدہ ہوں۔ ان کے کنبہ کے تئیں میری ہمدردی۔‘‘ وہ مزید لکھتے ہیں کہ ’’پورا ملک ان کی بے خوفی اور خدمت کے اعتراف میں ان کے ساتھ کھڑا ہے۔‘‘

قابل ذکر ہے کہ تیجس حادثہ کے بعد دبئی ایئر شو کو روک دیا گیا ہے۔ فضائیہ نے اس معاملے میں کورٹ آف انکوائری تشکیل دی ہے، جو کہ حادثہ کی وجہ کا پتہ لگائے گا۔ اس حادثہ کی ویڈیو سوشل میڈیا پر تیزی کے ساتھ وائرل ہو رہی ہے، جس میں طیارہ ہچکولے کھاتے ہوئے گرتا نظر آ رہا ہے۔ زمین پر گرنے کے ساتھ ہی تیز آواز ہوتی ہے اور طیارہ میں آگ لگ جاتی ہے۔ یہ ویڈیو دیکھ کر رونگٹے کھڑے ہو جاتے ہیں۔

اس حادثہ کے تعلق سے طرح طرح کی قیاس آرائیاں ہو رہی ہیں۔ کچھ لوگوں کا کہنا ہے کہ تیجس طیارہ کا پائلٹ ہوا میں کرتب دکھا رہا تھا اور اچانک توازن بگڑنے سے یہ حادثہ ہو گیا۔ کچھ لوگوں کا کہنا ہے کہ شاید ایندھن کے رساؤ کی وجہ سے حادثہ پیش آیا۔ اس سلسلے میں ہندوستانی فضائیہ کا کہنا ہے کہ ان کا ایک تیجس طیارہ دبئی ایئر شو-25 میں حادثہ کا شکار ہو گیا ہے۔ حادثہ کے بارے میں حقائق کی تصدیق کی جا رہی ہے۔ جیسے ہی تفصیلات سامنے آئیں گی، مطلع کیا جائے گا۔ سبھی جانکاریاں صرف تصدیق کے بعد ہی جاری کی جائیں گی۔ فضائیہ نے یہ بھی بتایا کہ حادثہ میں پائلٹ کو سنگین چوٹیں آئیں، جس سے ان کی موت ہو گئی۔