’راہل گاندھی او بی سی کے لیے دوسرے امبیڈکر ثابت ہوں گے‘، دلت لیڈر اُدت راج کا دعویٰ

تلنگانہ میں ریاستی حکومت ایس سی اور ایس ٹی طبقات کے سرمایہ کاروں کو کارپوریٹ شعبہ میں آگے بڑھانے کے لیے کئی منصوبے چلا رہی ہے۔ تلنگانہ کی اسی پیش قدمی پر کانگریس لیڈر اُدت راج کا ایک بیان سامنے آیا ہے۔ انھوں نے کہا ہے کہ جس طرح تلنگانہ حکومت ایس سی اور ایس ٹی طبقات کے لیے منصوبے چلا رہی ہے، راہل گاندھی او بی سی کے لیے اس طرح کا منصوبہ پورے ملک میں چلانا چاہتے ہیں۔ انھوں نے مزید کہا کہ اگر او بی سی راہل گاندھی کے نظریات کو سمجھیں گے تو وہ ملک کے دوسرے امبیڈکر ثابت ہوں گے۔

دراصل راہل گاندھی نے گزشتہ روز تالکٹورہ اسٹیڈیم میں تقریر کرتے ہوئے کہا تھا کہ انھوں نے اپنے سیاسی کیریئر میں او بی سی طبقہ کے لیے کچھ نہیں کیا۔ یہ ان کی سب سے بڑی غلطی تھی۔ انھوں نے کہا کہ جو کام میں او بی سی طبقہ کے لیے اب تک نہیں کر پایا، اسے اب دوگنی رفتار سے کروں گا۔

راہل گاندھی کے اس نظریہ کی اُدت راج نے تعریف کی۔ ساتھ ہی انھوں نے کہا کہ تلنگانہ میں ڈاٹا اکٹھا کیا گیا ہے جس سے پتہ چلتا ہے کہ کارپوریٹ شعبہ میں کتنے ایس سی اور ایس ٹی سرمایہ کار ہیں، اور ان میں سے کتنوں کے پاس ملازمت ہے۔ انھوں نے کہا کہ یہی بات راہل گاندھی پورے ملک کے لیے کرنا چاہتے ہیں۔ ان کی باتوں میں بہت دور اندیشی ہے۔ انھوں نے مزید کہا کہ اگر ہم پسماندوں یا دلتوں کو آگے لائیں گے تو ہمارے ملک میں معیشت بڑھے گی۔ اس سے سماج میں موجود عدم مساوات کم ہوگی۔

دلت لیڈر اُدت راج نے اپنے سوشل میڈیا اکاؤنٹ پر ایک پوسٹ شیئر کرتے ہوئے لکھا ہے کہ او بی سی کو سوچنا پڑے گا کہ تاریخ بار بار ترقی کے لیے موقع نہیں دیتی۔ تالکٹورہ اسٹیڈیم میں راہل گاندھی نے جو کچھ کہا، اس پر عمل شروع کر دیں اور ساتھ دیں۔ انھوں نے یہ بھی لکھا کہ اگر او بی سی راہل گاندھی کی باتوں پر غور کرتے ہیں تو راہل گاندھی ملک کے دوسرے امبیڈکر ثابت ہوں گے۔