راہل گاندھی کا انڈمان نکوبار جزائر کا دورہ، قبائلی برادری کے خدشات سنے، حقوق کے تحفظ کی یقین دہانی

لوک سبھا میں قائد حزب اختلاف راہل گاندھی نے منگل کے روز انڈمان نکوبار جزائر کے دورے کے دوران کیمپبل بے میں قبائلی برادری کے افراد سے ملاقات کی اور ان کے خدشات سنے۔ یہ ملاقات راجیو نگر کے کمیونٹی ہال میں منعقد ہوئی، جہاں انہوں نے مقامی لوگوں سے براہ راست بات چیت کی۔

’نکوبار ٹائمز‘ کی رپورٹ کے مطابق، راہل گاندھی نے کہا کہ وہ یہاں مرکزی حکومت کے ایک بڑے انفراسٹرکچر منصوبے سے متعلق مقامی سطح پر پائی جانے والی تشویش کو سمجھنے کے لیے آئے ہیں۔ انہوں نے بتایا کہ چند روز قبل انڈمان نکوبار سے ایک وفد نئی دہلی میں ان سے ملا تھا، جس میں مقامی نمائندوں کے ساتھ کانگریس کے رہنما بھی شامل تھے۔ اس وفد نے انہیں بتایا کہ جاری منصوبہ مقامی لوگوں کی خواہشات کے مطابق نہیں ہے اور اس سے ان کی زندگیوں پر منفی اثر پڑ سکتا ہے۔

انہوں نے کہا کہ اسی پس منظر میں انہوں نے خود یہاں آنے کا فیصلہ کیا تاکہ حالات کو اپنی آنکھوں سے دیکھ سکیں۔ ان کے مطابق، کسی بھی مسئلے کو بہتر طور پر سمجھنے کے لیے زمینی حقائق کا مشاہدہ ضروری ہوتا ہے، اسی لیے وہ مقامی برادری کے درمیان آ کر ان کی بات سننا چاہتے ہیں۔

راہل گاندھی نے کہا کہ انہیں بتایا گیا ہے کہ سونامی کے بعد مقامی لوگوں کو ایک جگہ سے دوسری جگہ منتقل کیا گیا تھا اور اب ایک بار پھر ان کی زمینوں کے حوالے سے خدشات سامنے آ رہے ہیں۔ انہوں نے یہ بھی کہا کہ بعض اقدامات جنگلات سے متعلق قوانین اور دیگر ضابطوں کے برخلاف ہونے کی بات کہی جا رہی ہے اور مقامی برادری اس حوالے سے فکرمند ہے۔

انہوں نے واضح کیا کہ ان کا مقصد یہاں آ کر تقریر کرنا نہیں بلکہ لوگوں کو سننا ہے۔ انہوں نے کہا کہ وہ دن بھر مختلف افراد سے بات کریں گے تاکہ صورتحال کو بہتر انداز میں سمجھ سکیں اور اس کے بعد ہی یہ طے کریں گے کہ وہ کس طرح مدد کر سکتے ہیں۔

راہل گاندھی نے اپنے دورے میں پیش آنے والی مشکلات کا بھی ذکر کیا۔ انہوں نے کہا کہ انہیں یہاں آنے سے روکنے کی کوشش کی گئی اور اجازت دینے میں تاخیر ہوئی، تاہم وہ یہاں پہنچنے میں کامیاب رہے اور مقامی لوگوں کے درمیان موجود ہونے پر خوشی محسوس کر رہے ہیں۔

انہوں نے قبائلی برادری کو یقین دلایا کہ وہ اور کانگریس پارٹی مل کر ان کے حقوق، زمین اور مستقبل کے تحفظ کے لیے ہر ممکن کوشش کریں گے۔ انہوں نے گرمی کے باوجود بڑی تعداد میں موجود لوگوں کا شکریہ ادا کیا اور کہا کہ ان کے مسائل کو سنجیدگی سے اٹھایا جائے گا۔

اپنے طے شدہ پروگرام کے مطابق راہل گاندھی نے گاندھی نگر کے کمیونٹی ہال میں آبادکار خاندانوں اور سابق فوجیوں سے بھی ملاقات کی۔ بعد ازاں انہوں نے اندرا پوائنٹ جا کر سابق وزیر اعظم اندرا گاندھی کو خراج عقیدت پیش کیا۔