کانگریس کی ’آئین بچاؤ مہم‘ آج سے، تالکٹورا اسٹیڈیم سے راہل پھونکیں گے بِگُل

بی جے پی کی قیادت والی مودی حکومت میں آئین اور دلتوں پر ہو رہے حملوں کے خلاف کانگریس آج (سوموار) سے آئین بچاؤ مہم شروع کر رہی ہے۔ اس کی شروعات دہلی کے تالکٹورا اسٹیڈیم میں ہوگی جس میں کانگریس سربراہ راہل گاندھی بھی حصہ لیں گے۔

یہ مہم اگلے سال 14 اپریل تک چلے گی جو کہ بابا صاحب بھیم راؤ امبیڈکر کی یومِ پیدائش ہے۔ اس مہم کے تحت مودی حکومت کی ان پالیسیوں کو اُجاگر کیا جائے گا جن سے آئین کی خلاف ورزی ہوتی ہے۔ ’آئین بچاؤ مہم‘ کے آغاز کے موقع پر سابق وزیر اعظم منموہن سنگھ، غلام نبی آزاد، ملکارجن کھڑگے اور سشیل کمار شندے شامل ہو سکتے ہیں۔ اس میں پنچایت، مقامی بلدیات اور ضلع سطح کے پارٹی افسر بھی حصہ لے سکتے ہیں۔ پارٹی ذرائع کا کہنا ہے کہ کانگرنس کارکنان کو یہ مہم اپنے اپنے علاقوں میں چلانے کی ہدایت دی جائے گی۔ کارکنان لوگوں کو مودی حکومت کی آئین مخالف پالیسیوں کے بارے میں بیدار کریں گے۔

کانگریس کا کہنا ہے کہ ’’بی جے پی حکومت میں آئین خطرے میں ہے۔ دلت طبقہ کو تعلیم اور ملازمت کے مواقع نہیں مل رہے ہیں۔ اس مہم کا مقصد ان ایشوز کو قومی سطح پر اٹھانا ہے۔‘‘ کانگریس کے شیڈول کاسٹ محکمہ کے سربراہ ویپن راؤت نے ایک بیان میں دعویٰ کیا کہ 2014 میں بی جے پی جب سے مرکز میں آئی ہے، کسی نہ کسی طریقے سے ملک کے آئین پر حملے ہوتے رہے ہیں۔ اس سے سماج کے محروم طبقوں کو ان کے آئینی حقوق نہیں مل رہے ہیں۔

کانگریس کا الزام ہے کہ بی جے پی-آر ایس ایس شیڈول کاسٹ، شیڈول ٹرائب اور دیگر کمزور طبقوں کو ملی سماجی تحفظ کو ختم کرنا چاہتی ہے۔ آر ایس ایس نظریہ آئین کے بنیادی ڈھانچے پر حملہ کرتا ہے جس کا کانگریس پارٹی مقابلہ کرے گی۔