ضمنی انتخاب میں کانگریس کی جیت نفرت کے خلاف ہر کارکن کی جیت: راہل گاندھی

کانگریس کے سابق صدر راہل گاندھی نے ضمنی انتخابات میں کانگریس کی جیت کو پارٹی کارکنوں کی جیت قرار دیا ہے، انھوں نے کارکنان سے کہا کہ وہ نفرت کے خلاف لڑتے رہیں اور خوف میں نہ آئیں۔

راہل گاندھی، تصویر آئی اے این ایس
راہل گاندھی، تصویر آئی اے این ایس
user

قومی آوازبیورو

لوک سبھا کی تین اور اسمبلی کی 29 سیٹوں پر ہوئے ضمنی انتخابمیں کانگریس نے شاندار جیت درج کی ہے۔ ہماچل پردیش میں تو کانگریس نے بی جے پی کا صفایا کر دیا ہے۔ وہاں کی دونوں اسمبلی سیٹیں اور منڈی لوک سبھا سیٹ کانگریس نے جیتی ہے۔ اس کے علاوہ راجستھان میں بھی کانگریس نے قابل قدر جیت درج کی ہے۔

اس کامیابی پر کانگریس کے سابق صدر راہل گاندھی نے کارکنان کو مبارکباد پیش کرتے ہوئے کہا کہ ’’کانگریس کی ہر جیت ہماری پارٹی کے کارکنان کی جیت ہے۔ نفرت کے خلاف لڑتے رہو ڈرو مت۔‘‘ انھوں نے یہ بات ہندی اور انگریزی دونوں زبان میں اپنے ٹوئٹ میں لکھی ہے۔


دوسری طرف کانگریس نے کہا ہے کہ ’’ضمنی انتخاب کے نتائج نئی شروعات، نئی تبدیلی کی طرف اشارہ کر رہے ہیں۔ لوگوں نے کانگریس پر بھروسہ ظاہر کر کے یہ واضح کر دیا ہے کہ صرف کانگریس ہی ملک کو ترقی کی راہ پر آگے بڑھا سکتی ہے۔‘‘ ہماچل کے نتائج پر کانگریس نے کہا کہ ’’ہماچل پردیش کی سمجھدار عوام نے کانگریس میں اپنا بھروسہ ظاہر کیا ہے، جس پر ہم کھڑے اتریں گے۔‘‘

علاوہ ازیں راجستھان اسمبلی کی دونوں سیٹوں کے ضمنی انتخاب میں بھی کانگریس نے جیت درج کی ہے۔ کانگریس نے کہا ہے کہ ’’راجستھان میں بی جے پی کا صفایا ہو گیا ہے۔ کانگریس کا پرچم لہرانے والے سبھی کامیاب امیدواروں دلی مبارکباد اور عوام کا شکریہ۔‘‘

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔