پہلے کے مقابلے 10 گنا زیادہ طاقت سے لڑوں گا، میں ہمیشہ غریبوں و کسانوں کے ساتھ: راہل

کانگریس صدر عہدہ سے استعفیٰ دینے کے ایک دن بعد جمعرات کو کانگریس لیڈر راہل گاندھی نے گزشتہ پانچ سال کے مقابلے میں 10 گنا زیادہ طاقت سے لڑنے کے عزم کا اظہار کیا۔ انھوں نے کہا کہ میں ہمیشہ غریبوں اور کسانوں کے ساتھ ہوں۔

مستقبل میں جارحانہ رخ اختیار کرنے کا اشارہ دیتے ہوئے راہل گاندھی نے کہا کہ ’’میری لڑائی جاری رہے گی۔ میں اپنی گزشتہ پانچ سال میں کی گئی لڑائی سے دس گنا زیادہ طاقت سے لڑوں گا۔‘‘ صدر عہدہ سے استعفیٰ دینے کے سوال پر انھوں نے کہا کہ وہ جو کہنا چاہتے تھے کل (بدھ کو) جاری کیے گئے اپنے خط میں لکھ دیا ہے۔

غور طلب ہے کہ راہل گاندھی نے بدھ کو استعفیٰ کا باضابطہ اعلان کرتے ہوئے کہا تھا کہ پارٹی کو دوبارہ مضبوط کرنے کے لیے سخت فیصلے لینے ہوں گے اور کئی لوگوں کو 2019 کی ناکامی کے لیے جوابدہ ہونا ہوگا۔ اس ناکامی کے لیے صرف دوسروں کو ذمہ دار ٹھہرانا اور صدر کے ناطے اپنی ذمہ داری قبول نہ کرنا، درست نہیں ہوگا۔

راہل گاندھی نے کارکنان کو لکھے خط میں کہا تھا کہ ’’میری لڑائی کبھی بھی ایک عام سیاسی اقتدار حاصل کرنے کی نہیں رہی۔ مجھے بی جے پی سے کوئی نفرت یا غصہ نہیں ہے، لیکن ہندوستان سے متعلق ان کے نظریہ کا میں سخت مخالف ہوں۔ میری مخالفت اس لیے ہے کیونکہ ہندوستان کے متعلق ان کا نظریہ اور میرے نظریہ میں زمین-آسمان کا فرق ہے۔ یہ کوئی نئی لڑائی نہیں ہے بلکہ ہزاروں سال سے ہماری زمین پر لڑی جا رہی ہے۔ انھیں اس میں اختلاف اور تفریق نظر آتا ہے، مجھے اس میں نابرابری نظر آتی ہے۔ جہاں انھیں نفرت نظر آتی ہے، مجھے محبت دکھائی پڑتی ہے۔

دوسری طرف کانگریس صدر عہدہ سے راہل گاندھی کے استعفیٰ کے بعد کانگریس جنرل سکریٹری اور ان کی بہن پرینکا گاندھی نے کہا کہ کچھ ہی لوگوں میں اس طرح کا فیصلہ لینے کی ہمت ہوتی ہے۔ انھوں نے ٹوئٹ کر کے کہا کہ میں آپ کے فیصلے کی عزت کرتی ہوں۔