صرف 5 گراف کے ٹوئٹ سے راہل گاندھی نے لاک ڈاؤن کی کھول دی قلعی

کانگریس لیڈر راہل گاندھی نے ایک ٹوئٹ میں صرف پانچ گراف کو شیئر کرتے ہوئے کورونا وائرس روکنے کے نام پر کیے گئے لاک ڈاؤن کی حکومتی پالیسی کا سب کے سامنے بینڈ بجا دیا۔

وزیرا عظم مودی اور کانگریس لیڈر راہل گاندھی کی فائل تصویر 
وزیرا عظم مودی اور کانگریس لیڈر راہل گاندھی کی فائل تصویر
user

قومی آوازبیورو

کانگریس لیڈر راہل گاندھی نے جمعہ کو ایک ٹوئٹ کیا جس کے ذریعہ انھوں نے مرکز کی مودی حکومت کی کورونا وائرس سے لڑنے کی پالیسی کی دھجیاں اڑا دیں۔ انھوں نے اپنے ٹوئٹ میں 5 گراف پیش کیے جس کے ذریعہ لاک ڈاؤن نافذ کرنے اور اسے ہٹانے کو لے کر اپنائی گئی سوچ پر براہ راست حملہ کرتے ہوئے اسے ناکام لاک ڈاؤن کا نام دیا۔

راہل گاندھی نے اپنے ٹوئٹ میں ہندوستان سمیت پانچ ممالک میں کورونا وائرس کے پھیلاؤ اور لاک ڈاؤن لگانے اور ہٹانے کے گراف کو دکھایا ہے۔ ٹوئٹ میں دیے گئے گراف سے واضح ہے کہ یوروپی ممالک میں کس طرح لاک ڈاؤن کے سبب کورونا انفیکشن والے افراد کی تعداد کم ہوئی ہے، لیکن ہندوستان میں ان مریضوں کی تعداد میں اضافہ ہی دیکھنے کو ملا ہے۔ ساتھ ہی یہ بھی ظاہر کیا گیا ہے کہ جب لاک ڈاؤن ہٹانے کا فیصلہ کیا گیا تو اس وقت ملک میں سب سے زیادہ کیسز ہیں۔


غور طلب ہے کہ راہل گاندھی کافی وقت سے کورونا وائرس پر حکومت کی پالیسی کو تنقید کا نشانہ بنا رہے ہیں۔ ساتھ ہی اس لاک ڈاؤن کے سبب غریب طبقے کے سامنے کھڑے ہوئے مسائل پر بھی اپنا رد عمل دیتے رہے ہیں۔ اس کے علاوہ مختلف شعبہ سے تعلق رکھنے والے ماہرین سے بات چیت کر کے بھی کورونا بحران میں حکومت کے ذریعہ اٹھائے گئے اقدام پر سوال اٹھائے ہیں۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔