راہل گاندھی نے ہریانہ میں ٹرک پر کی سواری، ڈرائیوروں سے ملاقات کر کے سنے ان کے مسائل، دیکھیں ویڈیو

نئی دہلی: کرناٹک اسمبلی انتخابات میں جیت کے بعد کانگریس لیڈر راہول گاندھی کو ٹرک پر سوار دیکھا گیاہے۔ راہل گاندھی گزشتہ روز دہلی سے شملہ کے لیے روانہ ہو گئے، اس دوران انہوں نے انبالہ سے چنڈی گڑھ تک ٹرک پر سواری کی اور ڈرائیوروں سے ملاقات کر کے ان کے مسائل سمجھنے کی کوشش کی۔

راہل گاندھی کی ٹرک پر سواریی کی ویڈیو سوشل میڈیا پر کافی وائرل ہو رہی ہے۔ کانگریس کے تمام کارکنوں اور لیڈروں نے راہل کی ٹرک میں سفر کرنے کی ویڈیو شیئر کی ہے۔ اس کے علاوہ عام صارفین بھی اس ویڈیو کو شیئر کرتے ہوئے راہل گاندھی کی تعریف کر رہے ہیں۔

کانگریس کی قومی ترجمان سپریہ شرینیت نے راہل گاندھی کے ٹرک سے سفر کرنے کی ویڈیو ٹوئٹر پر شیئر کی ہے۔ انہوں نے لکھا ’’یونیورسٹی کے طلباء سے، کھلاڑیوں سے، سول سروس کی تیاری کرنے والے نوجوانوں سے، کسانوں سے، ڈلیوری پارٹنرز سے، بس میں عام شہریوں سے اور اب آدھی رات کو ٹرک کے ڈرائیور سے، راہل گاندھی ان سبھی سے ملاقات کیوں کر رہے ہیں؟ کیونکہ وہ اس ملک کے لوگوں کی بات سننا چاہتے ہیں، ان کی مشکلات اور مسائل کو سمجھنا چاہتے ہیں۔‘‘

سپریہ شرینیت نے مزد کہا ’’انہیں (راہل گاندھی کو) ایسا کرتے دیکھ کر یقین ہوتا ہے کہ کوئی تو ہے جو عوام کے ساتھ کھڑا ہے، کوئی تو ہے جو ان کے بہتر کل کے لیے ہر قسم کی قربانی دینے کو تیار ہے، کوئی تو ہے جو نفرتوں کے بازار میں محبت کی دکان کھول رہا ہے۔ اور آہستہ آہستہ یہ احساس ہو رہا ہے کہ یہ ملک محبت اور امن کی راہ پر لوٹنا چاہتا ہے۔ آہستہ آہستہ یہ ملک آخر کار راہل گاندھی کے ساتھ چل ہی پڑا ہے۔‘‘