راہل نے خود کو پیدائش کے بعد سب سے پہلے گود میں اٹھانے والی نرس کو گلے لگایا

نئی دہلی: کانگریس صدر راہل گاندھی نے اتوار کو کیرالہ کے دورے کے دوران اس نرس سے ملاقات کی جو دہلی کے ایک اسپتال میں ان کی پیدائش کے وقت موجود تھیں۔ راہل گاندھی نے اپنے دورے کے تیسرے دن کوہزیکوڈ میں 72 سالہ ریٹائرڈ نرس راجمّا سے ملاقات کی اور ان کے تئیں احترام کا اظہار کیا۔ راجما کا کہنا ہے کہ جب راہل گاندھی کی پیدائش ہوئی تھی تو سب سے پہلے انہوں نے ہی راہل کوگود میں اٹھایا تھا۔

راجما نے رہل گاندھی کو ایک کٹہل کے چپس کا پیکٹ تحفے میں دیا جو انہوں نے اپنے ہاتھوں سے تیار کیا ہے۔ راہل گاندھی وائناڈ میں لوک سبھا الیکشن لڑ رہے تھے تو راجما نے ان سے ملنے کی خواہش ظاہر کی تھی۔ راجما بنیادی طورپر وائناڈ کی ہی رہنے والی ہیں۔

راہل گاندھی نے 4.31 لاکھ ووٹوں کے فرق سے جیت درج کر کے خود کو پارلیمان میں بھیجنے کے لئے وائناڈ کے لوگوں کا شکریہ ادا کرنے کے لئے اپنے مصروف معمول کے باوجود راجما کے شوہر، ناتی-پوتوں سمیت پورے خاندان کے لئے وقت نکالا۔ انہوں نے راجما کے رشتہ داروں اور کچھ پارٹی کارکنان کے ساتھ تصویر بھی کھنچوائی۔ ان لوگوں کو راہل سے ملنے کے لئے کافی دیر تک انتظار بھی کرنا پڑا۔

واضح رہے کہ 19 جون 1970 کو جب دہلی کے ہولی فیملی اسپتال میں راہل گاندھی کی پیدائش ہوئی تھی تو اس وقت رجما نے ایک ٹرینی نرس کے طور پر وہاں راہل گاندھی کی دیکھ بھال کی تھی۔ جب راجما نے راہل کو بتایا کہ جب ان کا جنم ہوا تھا تو انہوں نے ہی اپنے ہاتھوں میں سب سے پہلے انہیں اٹھایا تھا، تو وہ انہیں غور سے سنتے رہے۔ راہل گاندھی نے جاتے وقت ان سے پھر ملاقات کا وعدہ کیا۔