رام لیلا میدان سے الیکشن کمشنروں کو راہل گاندھی کی کھلی وارننگ

کل یعنی اتوار کو کانگریس نے دہلی کے رام لیلا میدان میں "ووٹ چور، گدی چھوڑ" کے عنوان سے ایک بڑی ریلی کا اہتمام کیا۔ کانگریس صدر ملکارجن کھڑگے، راہل گاندھی، پرینکا گاندھی، سونیا گاندھی، ریونت ریڈی، سکھوندر سکھو، منیش تیواری سمیت کئی دیگر کانگریسی رہنماؤں نے ریلی میں شرکت کی۔

کانگریس رہنما راہل گاندھی نے بھیڑ سے خطاب کرتے ہوئے کہا کہ بھارتیہ جنتا پارٹی (بی جے پی) الیکشن جیتنے کے لیے ووٹ چراتی ہے، اور الیکشن کمیشن اس میں حکومت کی مکمل حمایت کرتا ہے۔ بدلے میں حکومت الیکشن کمشنرز کو قانونی استثنیٰ دے کر تحفظ دے رہی ہے۔

کانگریس رہنما  راہل گاندھی نے الیکشن کمیشن کے خلاف ایک سخت بیان جاری کیا۔ انہوں نے کہا کہ گیانیش کمار، سکھبیر سنگھ سندھو، اور وویک جوشی کو یاد رکھنا چاہیے کہ ملک میں سچ اور جھوٹ کے درمیان جنگ جاری ہے۔ راہل گاندھی نے الزام لگایا کہ الیکشن کمیشن بی جے پی حکومت کے ساتھ ملی بھگت سے کام کر رہا ہے۔

انہوں نے کہا کہ وزیر اعظم نریندر مودی نے الیکشن کمشنروں کو کنٹرول کرنے والے قانون میں تبدیلی کی اور ایک نیا قانون متعارف کرایا، جس کے تحت ان کے خلاف کوئی کارروائی نہیں کی جا سکتی۔ یہ قانون انہیں مکمل استثنیٰ دیتا ہے، چاہے وہ کچھ بھی کریں۔ راہل گاندھی نے کہا کہ الیکشن کمشنروں کو یہ نہیں بھولنا چاہئے کہ وہ ہندوستان کے الیکشن کمشنر ہیں، نریندر مودی کے الیکشن کمشنر نہیں ہیں۔

کانگریس لیڈر نے خبردار کیا کہ جب ان کی حکومت برسراقتدار آئے گی تو اس قانون کو تبدیل کیا جائے گا اور الیکشن کمشنروں کے خلاف کارروائی کی جائے گی۔ انہوں نے کہا کہ کانگریس سچ کی جنگ لڑ رہی ہے، جبکہ الیکشن کمیشن اقتدار کے ساتھ کھڑا نظر آتا ہے۔

راہل گاندھی نے کہا کہ ملک میں دو نظریات کے درمیان جنگ چل رہی ہے۔ ایک آر ایس ایس کا نظریہ ہے جو سچائی کے خلاف ہے اور اقتدار کے لیے کچھ بھی کرے گا۔ دوسرا کانگریس کا نظریہ ہے جس کی بنیاد سچائی اور عدم تشدد پر ہے۔ مرکزی وزیر داخلہ امت شاہ کو نشانہ بناتے ہوئے راہل گاندھی نے کہا کہ پارلیمنٹ میں ان کے جواب کے دوران ان کی گھبراہٹ صاف دکھائی دے رہی تھی۔ انہوں نے دعویٰ کیا کہ اقتدار کے ہاتھ سے نکلتے ہی بی جے پی لیڈروں کی نام نہاد 'بہادری' بھی ختم ہو جائے گی۔