راہل گاندھی نے وائناڈ سیٹ سے کاغذات نامزدگی کئے داخل، پرینکا بھی رہیں موجود

کیرالہ کے وائناڈ میں کانگریس صدر راہل گاندھی نے پرچہ نامزدگی داخل کر دیا ہے۔ اس دوران ان کے ساتھ کانگریس جنرل سکریٹری پرینکا گاندھی بھی موجود تھیں۔ راہل گاندھی کے استقبال میں وہاں ان کے حامی بھی سینکڑوں کی تعداد میں نظر آئے۔ قابل غور ہے کہ اس وائناڈ پارلیمانی حلقہ کے علاوہ راہل گاندھی اتر پردیش میں اپنی روایتی امیٹھی سیٹ سے بھی انتخاب لڑ رہے ہیں۔ نامزدگی کا پرچہ بھرنے کے بعد راہل گاندھی نے اپنی بہن پرینکا گاندھی کے ساتھ روڈ شو کیا۔ اس روڈ شو میں ان کے استقبال کے لیے عوامی سیلاب امنڈ پڑا۔

واضح رہے کہ این ڈی اے نے اس سیٹ سے تشار ویلاپلی کو راہل گاندھی کے سامنے اتارا ہے۔ تشار بھارت دھرم جن سینا کے صدر ہیں۔ کیرالہ میں بایاں ،محاذ پارٹیوں کے اتحاد ایل ڈی ایف نے وائناڈ پارلیمانی حلقہ سے سی پی آئی کے پی پی سنیر کو اتارا ہے۔ لیکن وائناڈ کو کانگریس کا گڑھ مانا جاتا ہے۔ 2009 اور 2014 کے لوک سبھا انتخابات میں بھی اس سیٹ پر کانگریس نے اپنا پرچم لہرایا تھا۔

اس سے قبل راہل گاندھی جمعرات کی صبح تقریباً 11 بجے ہیلی کاپٹر سے پرینکا واڈرا کے ساتھ وائناڈ پہنچے۔ قابل غور ہے کہ کانگریس پارٹی اور یو ڈی ایف نے راہل گاندھی کو کیرالہ سے انتخاب لڑنے کے لیے مدعو کیا تھا۔ راہل گاندھی کو اسی طرح کی دعوت کرناٹک اور تمل ناڈو سے بھی ملی تھی، لیکن انھوں نے کیرالہ کے وائناڈ سے الیکشن لڑنا قبول کیا۔ واضح رہے کہ وائناڈ میں 23 اپریل کو ووٹنگ ہونی ہے۔ ووٹوں کی گنتی 23 مئی کو ہوگی۔