راہل گاندھی کا وزیراعظم پر تنقیدی حملہ، ’روسی تیل نہ خریدنے کا وعدہ، پی ایم مودی ٹرمپ سے خوفزدہ‘

نئی دہلی: لوک سبھا میں حزبِ اختلاف کے رہنما راہل گاندھی نے جمعرات کو وزیراعظم نریندر مودی پر سخت تنقید کی اور کہا کہ وہ ڈونلڈ ٹرمپ سے خوفزدہ ہیں۔ راہل گاندھی نے یہ بیان امریکی صدر نے اس دعویٰ کے بعد دیا ہے جس میں انہوں نے کہا تھا کہ وزیراعظم مودی نے انہیں یقین دلایا ہے کہ ہندوستان روسی تیل کی خریداری بند کر دے گا۔

راہل گاندھی نے ایکس پر لکھا، ’’وزیراعظم ٹرمپ سے خوفزدہ ہیں۔ ایک: ٹرمپ کو اجازت دیتے ہیں کہ وہ اعلان کریں کہ ہندوستان روسی تیل نہیں خریدے گا۔ دو: بار بار نظر انداز کیے جانے کے باوجود مبارکباد کے پیغامات بھیجتے رہتے ہیں۔ تین: وزیر خزانہ کے امریکہ کے دورے کو منسوخ کیا۔ چار: شرم الشیخ اجلاس میں شرکت نہیں کی۔ پانچ: آپریشن سندور پر ٹرمپ کی باتوں کی تردید نہیں کی۔‘‘

راہل گاندھی نے وزیراعظم پر الزام لگایا کہ وہ ذاتی تعلقات کو ملک کی خارجہ پالیسی پر فوقیت دے رہے ہیں، جس کی مثالیں انہوں نے دی ہیں: وزیر خزانہ کے امریکہ کے دورے کو منسوخ کرنا، شرم الشیخ میں شرکت سے گریز، اور آپریشن سندور پر ٹرمپ کے بیانات کی مخالفت نہ کرنا۔ ان کے مطابق، یہ اقدامات ملک کی خودمختاری اور بین الاقوامی ساکھ کے لیے نقصان دہ ہیں۔ کانگریس کا کہنا ہے کہ روس سے تعلقات ہمیشہ ہندوستان کے لیے اہم رہے ہیں اور ذاتی تعلقات کے لیے یہ تعلقات متاثر کرنا ملک کے مفاد کے خلاف ہے۔

کانگریس پارٹی نے بھی وزیراعظم پر الزام لگایا کہ وہ ملک کے وقار سے سمجھوتہ کر رہے ہیں۔ پارٹی نے کہا، ’’روس ہمیشہ سے ہندوستان کا قریبی حلیف رہا ہے۔ ذاتی دوستی کے تعلقات بہتر کرنے کے لیے ملک کے تعلقات کو نقصان نہ پہنچائیں۔‘‘

خیال رہے کہ ٹرمپ نے بدھ کے روز کہا کہ مودی نے انہیں یقین دلایا ہے کہ ہندوستان روسی تیل کی خریداری بند کر دے گا۔ انہوں نے کہا، ’’انہوں نے مجھے یقین دلایا کہ روس سے کوئی تیل نہیں خریدا جائے گا۔ فوری طور پر یہ ممکن نہیں مگر عمل جلد مکمل ہو جائے گا۔‘‘

اسی دوران، ایک سوال کے جواب میں ٹرمپ نے کہا، ’’ہاں، یقینی طور پر۔ وہ میرے دوست ہیں، ہمارے تعلقات بہت اچھے ہیں۔ میں خوش نہیں تھا کہ ہندوستان تیل خرید رہا ہے اور انہوں نے مجھے یقین دلایا کہ وہ روس سے تیل نہیں خریدیں گے۔ اب ہمیں چین سے بھی یہی توقع ہے۔‘‘