مہنگی تعلیم سے کیسے بنے گا نیو انڈیا؟: راہل

سوالات پوچھنے کے سلسلہ میں آج راہل گاندھی نے وزیر اعظم نریندر مودی سے تعلیم کے تعلق سے سوال کیا۔ کانگریس کے نائب صدر نے تعلیمی نظام کی بدحالی پر حکومت کو نشانہ بنایا ہے۔

’گجرات مانگے جواب ‘ ہیش ٹیگ کے ساتھ راہل گاندھی نے ٹوئٹ کرتے ہوئے’پردھان منتری جی – چوتھا سوال ‘ کے عنوان سے سوال کیا۔ انہوں نے لکھا ’’سرکاری اسکول-کالجوں میں بڑھی فیس ، تعلیم کا کاروبار۔ مہنگی تعلیم سے پڑی ہر طالب علم پر مار، نیو انڈیا کا سپنا کیسے ہوگا ساکار۔‘‘

اس شاعرانہ سوال کے ساتھ راہل گاندھی نے گجرات میں تعلیم کی حالت زار کا بھی تذکرہ کیا۔ راہل گاندھی نے دعویٰ کیا کہ ’’شعبہ تعلیم پر گجرات حکومت خرچ میں ملک میں 26 ویں مقام پرکیوں؟ نوجوانوں نے کیا غلطی کی ہے؟‘‘

قبل ازیں راہل گاندھی نے اپنے تیسرے سوال میں گجرات حکومت پر بجلی خرید کر پرائیویٹ کمپنیوں کو فائدہ پہنچانے کا الزام لگایا تھا۔ وہیں دوسرے سوال میں انہوں نے گجرات حکومت کے قرض کے حوالے سے سوال کیا تھا۔ راہل گاندھی نے دعویٰ کیا تھاکہ 1995 میں گجرات حکومت پر 9183 کروڑ روپے کا قرض تھا جواب 2017 میں بڑھ کر 241000 کروڑ روپے ہو گیا ہے۔

واضح رہے کہ گجرات میں راہل گاندھی پوری قوت کے ساتھ تشہیر ی مہم میں مصروف ہیں۔ ریلیوں اور ٹوئٹر کے ذریعے وہ وزیر اعظم کو نشانہ بنا رہے ہیں ، اب جبکہ گجرات میں پولنگ کی تاریخیں نزدیک آچکی ہے ایسے حالات میں دونوں اہم سیاسی جماعتوں کے درمیان الزام برائے الزام کا سلسلہ بھی تیز ہو گیا ہے۔