کانگریس پہلے ہی گجرات جیت چکی ہے: راہل گاندھی

کانگریس کے سابق صدر اور سینئر رہنما راہل گاندھی نے کہا ہے کہ کانگریس انتخابات سے پہلے ہی گجرات جیت چکی ہے۔ راہل گاندھی نے یہ بات ہفتہ کو گجرات میں منعقد 'چنتن شیویر' سے خطاب کرتے ہوئے کہی۔

اس سال کے آخر میں ریاست میں ہونے والے اسمبلی انتخابات سے قبل کیمپ میں راہل گاندھی نے کہا کہ پارٹی کو لوگوں تک ان کے مسائل کو حل کرنے کے منصوبے کے ساتھ پہنچنے کی ضرورت ہے۔

کانگریس لیڈر نے پنڈال میں آویزاں مہاتما گاندھی کی تصویر کی طرف اشارہ کرتے ہوئے کہاکہ "ہماری پارٹی گجرات میں پیدا ہوئی تھی۔"انہوں نے کہا کہ آزادی سے قبل ہندوستان کی ہر ریاست میں کانگریس مضبوطی سے ابھری تھی اور اگرچہ بہت سے لیڈر تھے لیکن پارٹی کو سوچ اور سمت مہاتما گاندھی نے دی تھی جو گجراتی تھے۔

وزیر اعظم نریندر مودی پر حملہ کرتے ہوئے راہل گاندھی نے کہا کہ ان کے پاس حکومت، سی بی آئی اور ای ڈی جیسی ایجنسیاں ہیں اور "اچھے کپڑے" ہیں جبکہ مہاتما گاندھی کے پاس کیا تھا ۔ انہوں نے مہاتما گاندھی کی تصویر کی طرف اشارہ کیا جہاں وہ لنگوٹ پہنے ہوئے تھے اور کہاکہ "یہی سچائی دکھتی ہے۔‘‘

کانگریس لیڈر نے کہا کہ گجرات میں 2017 کے آخری اسمبلی انتخابات میں ریاست کے ایک پارٹی لیڈر نے کہا تھا کہ وہ 40-45 سیٹیں جیتیں گےلیکن جب نتائج کا اعلان ہوا تو ہم سات سیٹوں سے ہار گئے۔