ووٹر ادھیکار یاترا: راہل گاندھی نے کہا- ’شہریوں سے ووٹ کا حق چھیننے کی کوشش کی جا رہی ہے‘

کانگریس کے سینئر لیڈر اور لوک سبھا میں قائد حزب اختلاف راہل گاندھی نے ووٹر ادھیکار یاترا کے دوران نوادہ میں جم غفیر سے خطاب کیا اور بی جے پی اور الیکشن کمیشن پر شدید تنقید کی۔ انہوں نے کہا کہ بی جے پی اور الیکشن کمیشن مل کر ووٹ چوری کر رہے ہیں اور آئین کے تحت شہریوں کو دیا گیا ووٹ دینے کا حق چھیننے کی کوشش کی جا رہی ہے۔

راہل گاندھی نے کہا کہ بی جے پی نے مہاراشٹر، ہریانہ اور مدھیہ پردیش میں انتخابات چرانے کی کوشش کی۔ مہاراشٹر میں لوک سبھا اور اسمبلی انتخابات کے درمیان الیکشن کمیشن نے ایک کروڑ نئے ووٹرز بنا دیے لیکن جب کانگریس نے پوچھا کہ یہ ووٹر کون ہیں تو کوئی جواب نہیں دیا گیا۔ انہوں نے یہ بھی بتایا کہ قانون میں تبدیلی کر کے ویڈیوگرافی کی سہولت بھی محدود کر دی گئی۔

راہل گاندھی نے بتایا کہ اب بہار میں ایس آئی آر کے نام پر ووٹ چوری کی کوشش کی جا رہی ہے اور کانگریس انہیں اس اقدام میں کامیاب نہیں ہونے دے گی۔ انہوں نے خبردار کیا کہ اگر یہ سلسلہ جاری رہا تو پہلے ووٹر کارڈ، پھر راشن کارڈ اور آخرکار زمینیں بڑی کمپنیوں کو دی جائیں گی۔

راہل گاندھی کا کہنا تھا کہ ملک صرف چند بڑے سرمایہ داروں کا نہیں ہے بلکہ یہ نوجوانوں، کسانوں اور چھوٹے تاجروں کا بھی ملک ہے، اور انہیں یہ صورتحال مل کر بدلنی ہوگی۔

دریں اثنا، ووٹر ادھیکار یاترا کے دوران کانگریس کے کارکن سبودھ کمار نے راہل گاندھی کو ووٹ چوری کی ایک حقیقی کہانی سنائی۔ سبودھ کمار نے بتایا کہ ان کا نام ووٹر لسٹ سے نکال دیا گیا، وہ 2024 کے لوک سبھا انتخابات میں ووٹ دے چکے تھے اور حتیٰ کہ پولنگ ایجنٹ بھی تھے لیکن ان کے ووٹ کو تسلیم نہیں کیا گیا۔ یہ واقعہ نوادہ، بہار میں پیش آیا، جہاں لوگوں نے بڑی تعداد میں کانگریس کے رہنما کو سنا۔

راہل گاندھی کے خطاب نے لوگوں میں سیاسی شعور بیدار کرنے اور ووٹ دینے کے حق کے تحفظ کی اہمیت کو اجاگر کیا۔ انہوں نے زور دیا کہ صرف ووٹ دینا کافی نہیں، بلکہ اس حق کے تحفظ کے لیے بھی جدوجہد ضروری ہے۔ انہوں نے لوگوں سے اپیل کی کہ وہ اپنا حق استعمال کریں اور ان اقدامات کے خلاف متحد ہوں جو جمہوری حقوق کو محدود کر رہے ہیں۔

کانگریس نے سوشل میڈیا پر اس یاترا کی اہمیت کو اجاگر کرتے ہوئے کہا کہ بہار میں تبدیلی کی کہانی لکھی جا رہی ہے۔ پارٹی اس مہم کے ذریعے عوام کو لگاتار ووٹ کے حق کے تحفظ کے لیے متحرک کر رہی ہے۔