چرنجیت سنگھ چنّی نے وزیر اعلیٰ عہدہ کا لیا حلف، 2 نائب وزرائے اعلیٰ کی بھی حلف برداری

کانگریس لیڈر چرنجیت سنگھ چنّی نے پنجاب کے وزیر اعلیٰ عہدہ کا حلف لے لیا، ان کے علاوہ سکھجندر سنگھ رندھاوا اور او پی سونی نے نائب وزیر اعلیٰ عہدہ کا حلف لیا۔

تصویر یو این آئی
تصویر یو این آئی
user

قومی آوازبیورو

کانگریس کے نئے قانون ساز پارٹی لیڈر چرنجیت سنگھ چنّی نے پنجاب کے 16ویں وزیر اعلیٰ کی شکل میں حلف لے لیا ہے۔ حلف برداری کی یہ تقریب چنڈی گڑھ میں منعقد کی گئی۔ سکھجندر سنگھ رندھاوا اور او پی سونی نے نائب وزیر اعلیٰ کا حلف لیا۔ پروگرام میں کانگریس لیڈر راہل گاندھی، پنجاب ریاستی کانگریس صدر نوجوت سنگھ سدھو اور ہریش راوت بھی موجود تھے۔

موصولہ اطلاعات کے مطابق تقریب میں 40 لوگوں کو مدعو کیا گیا تھا۔ پنجاب کے گورنر بنواری لال پروہت نے راج بھون میں منعقد ایک تقریب میں چنّی کو عہدہ اور رازداری کا حلف دلایا۔ چنّی اور ان کے دونوں نائبین نے پنجابی زبان میں حلف لیا۔ قابل ذکر ہے کہ چنّی ریاست میں وزیر اعلیٰ عہدہ سنبھالنے والے پہلے دلت لیڈر ہیں۔


واضح رہے کہ کیپٹن امریندر سنگھ نے اتوار کو 58 سالہ جانشیں کو مبارکباد پیش کرتے ہوئے کہا تھا ’’چرنجیت سنگھ چنّی کو میری نیک خواہشات۔ مجھے امید ہے کہ وہ پنجاب کے سرحدی ریاست کو محفوظ رکھنے اور سرحد پار سے بڑھتے خطرات سے ہمارے لوگوں کی حفاظت کرنے میں اہل ہوں گے۔‘‘

حلف برداری تقریب سے قبل نامزد وزیر اعلیٰ نے پیر کی صبح اپنے آبائی علاقہ چمکور صاحب واقع گرودوارہ کٹال گڑھ صاحب میں پیشانی ٹیکی۔ روپ نگر ضلع کے چمکور صاحب اسمبلی حلقہ سے تین بار کے رکن اسمبلی چنّی 2012 میں کانگریس میں شامل ہوئے تھے اور کیپٹن امریندر کی کابینہ میں تکنیکی تعلیم، صنعتی تربیت، روزگار اور سیاحت و ثقافتی معاملوں کے محکمہ کو سنبھال رہے تھے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔