پنجاب کے پاس کووڈ ویکسین کی سپلائی صرف پانچ روز کی بچی ہے: وزیر اعلی

پنجاب میں کورونا ویکسین کی سپلائی محض پانچ روز کے لئے بچی ہے اس لئے ریاست کو اس کی فراہمی جلد کی جائے کیونکہ ٹیکہ کاری مہم متاثرہورہی ہے۔

وزیراعلیٰ کیپٹن امریندرسنگھ نے آج مرکزی حکومت سے اپیل کی کہ ریاست میں کورونا وائرس کے بڑھتے متاثرین کے پیش نظر ایک روز میں 85 ہزار سے 90 ہزارافراد کو ٹیکہ لگایا جارہا ہے۔ ریاست کے پاس صرف پانچ دن کی سپلائی بچی ہے۔ انہوں نے مرکزی حکومت سے تصدیق کئے گئے سپلائی آرڈر کے حساب سے اگلی سہ ماہی کے لئے ریاستوں کو ویکسین کی سپلائی کاپروگرام شیئرکئے جانے کی اپیل کی۔کووڈ ویکسین کی اگلی سپلائی جلدکرنے کی امیدظاہر کرتے ہوئے انہوں نے کہا کہ اگرریاست ایک روز میں دولاکھ ٹیکہ کاری کا ہدف بناتی ہے تو اس حساب سے ویکسین تین دن میں ختم ہوجائے گی۔

انہوں نے وزیراعظم اور مرکزی وزیرصحت کو خط لکھ کراگلی سپلائی سے متعلق پروگرام شیئرکرنے کے لئے کہا ہے۔کووڈ کی صورتحال پر کانگریس کی صدر سونیا گاندھی کے ساتھ تبادلہ خیال کے لئے بلائی گئی ویڈیو کانفرنس کے دوران وزیراعلیٰ نے بتایا کہ ٹیکہ کاری کی شروعات آہستہ ہونے کے باوجود روزانہ 85 سے 90 ہزار لوگوں کے حساب سے ریاست میں اب تک سولہ لاکھ لوگوں کو کووڈ کے ٹیکے دئے جاچکے ہیں۔

میٹنگ میں راہل گاندھی سمیت کانگریس کی حکمرانی والی ریاستوں کے وزرائے اعلیٰ نے شرکت کی۔ کیپٹن سنگھ نے بتایا کہ زرعی قوانین کے امورپر حکومت ہند کے خلاف بڑھ رہے غصے کے سبب بڑی تعداد میں لوگ ٹیکہ کاری کے لئے سامنے نہیں آرہے ہیں۔ عام لوگ بھی کسان تحریک سے متاثر ہیں۔ یہ غصہ ٹیکہ کاری مہم پر اثراندازہورہا ہے۔ وزیراعلیٰ نے کہا کہ ان کی حکومت ٹیکہ کاری کے خلاف غلط فہمیوں کو دورکرنے کے لئے وسیع پیمانے پر میڈیا مہم چلارہی ہے۔