منموہن سنگھ کا کردار دیانت اور وقار کی علامت تھا: پرینکا گاندھی

پرینکا گاندھی نے سابق وزیراعظم ڈاکٹر منموہن سنگھ کے انتقال پر گہرے دکھ کا اظہار کرتے ہوئے انہیں دیانت اور وقار کی علامت قرار دیا۔ انہوں نے کہا کہ منموہن سنگھ کی دیانتداری ہمیشہ ایک تحریک رہے گی اور وہ ان افراد میں شامل تھے جو حقیقی معنوں میں ہندوستان سے محبت کرتے ہیں۔

انہوں نے کہا، ’’ڈاکٹر منموہن سنگھ ایک عظیم رہنما تھے، جنہوں نے مشکل حالات اور سیاسی مخالفین کے ذاتی حملوں کے باوجود ملک کی خدمت کے عزم پر کبھی سمجھوتہ نہیں کیا۔ وہ ایک منفرد باوقار اور نرم مزاج شخصیت تھے جو سیاست کی سخت دنیا میں ایک نمایاں مقام رکھتے تھے۔‘‘

پرینکا گاندھی نے ان کے انتقال کو ملک کے لیے ایک بڑا نقصان قرار دیا اور کہا کہ وہ ایک برابری پسند، دانشمند، مضبوط ارادے کے حامل اور بہادر انسان تھے، جنہوں نے اپنی زندگی کے آخری لمحے تک اپنے اصولوں پر قائم رہ کر ملک کی خدمت کی۔

انہوں نے کہا کہ منموہن سنگھ کا دورِ حکومت نہ صرف اقتصادی اصلاحات بلکہ سیاسی استحکام اور عوامی فلاح و بہبود کے حوالے سے بھی یادگار رہے گا۔ ان کی قیادت نے بھارت کو عالمی نقشے پر ایک مستحکم مقام دلانے میں اہم کردار ادا کیا۔

کانگریس پارٹی نے بھی ڈاکٹر منموہن سنگھ کو زبردست خراج تحسین پیش کرتے ہوئے کہا کہ ان کی وراثت ہندوستان کے لیے ایک مشعل راہ ہے۔ کانگریس نے ایکس پر لکھا، ’’تاریخ ڈاکٹر منموہن سنگھ جی کو ان کے وقار، عوامی خدمت کے عزم، وسیع علم اور عاجزی کے لیے ہمیشہ یاد رکھے گی۔‘‘

پارٹی نے مزید کہا کہ ان کی قیادت اقتصادی خوشحالی، سیاسی استحکام اور سماجی فلاح کے امتزاج کی عکاس تھی۔ ان کی پالیسیوں نے نہ صرف کروڑوں افراد کی زندگیوں کو بہتر بنایا بلکہ بھارت کو عالمی سطح پر مستحکم اور مضبوط پوزیشن دلائی۔‘‘

پرینکا گاندھی نے ان کی وراثت کو ہمیشہ یاد رکھنے کی تاکید کرتے ہوئے کہا، ’’منموہن سنگھ کا کردار اور ان کی خدمات ایک مثال ہیں، جو آنے والے سیاستدانوں کے لیے ایک مشعل راہ رہیں گی۔ دعا ہے کہ ان کی روح کو سکون نصیب ہو۔‘‘

ڈاکٹر منموہن سنگھ کی آخری رسومات پورے سرکاری اعزاز کے ساتھ ادا کی جائیں گی۔ ملک بھر میں ان کی خدمات کو خراج تحسین پیش کرنے کا سلسلہ جاری ہے اور حکومت نے سات دن کے قومی سوگ کا اعلان کیا ہے۔